Təhsil gələcək həyatımızın təməlidir. Keyfiyyətli təhsil üçün isə doğru məktəb seçimi vacibdir. Azərbaycanda dövlət və özəl məktəblər mövcuddur. Dövlət məktəblərində təhsil pulsuzdur, özəl məktəblərdə isə təhsil haqqı müxtəlif amillərə görə dəyişir: məktəbin yerləşdiyi yer, tədris dili, dərs vəsaitləri, qidalanma, müəllim heyəti və s.
Valideynlər özəl məktəblərdə dərs keyfiyyətinin daha yüksək olduğunu deyirlər. Bəzi özəl məktəblərdə tədris yalnız ingilis dilində aparılır və bu, təhsil haqqını artırır. İbtidai siniflərdə və Azərbaycan bölməsində qiymətlər daha münasib, yuxarı siniflərdə və xarici bölmələrdə isə daha yüksəkdir. Mərkəzə yaxın məktəblərin təhsil haqları da daha bahalı olur. Bəzi məktəblər bir ailədən iki uşaq gələndə endirim tətbiq edir.
Tehsil365 Banco.az-a istinadan xəbər verir ki, Azərbaycanda özəl məktəblərdə illik təhsil haqqı 2 500 – 55 000 manat arasında dəyişir. Bəzi məktəblərdə isə qiymətlər bütün siniflər üçün eynidir. 2025–2026-cı tədris ili üçün qeydiyyat artıq başlayıb. Banco.az-ın araşdırmasına əsasən, bir çox məktəbdə qiymətlər 300–1 000 manat artıb, bəzilərində isə dəyişməz qalıb. Ətraflı məlumat infoqrafik cədvəldədir.
Araşdırılan məktəblər bunlardır: Bakı Atatürk Liseyi, Simurq Liseyi, Hədəf Liseyi, Western School, Müasir İnnovasiyalar Liseyi, Landau School, Yaşam Beynəlxalq Məktəbi, Bakı Beynəlxalq Təhsil Kompleksi, Kaspi Liseyi, Ada School, Bakı İstanbul Liseyi, Evrika Liseyi, Erudit Liseyi, Maarif Məktəbləri, İdrak Liseyi, Dünya Məktəbi, Avropa Azərbaycan Məktəbi, XXI Əsr Beynəlxalq Təhsil və İnnovasiya Mərkəzi, Britaniya Məktəbi , Sabis Sun International School, Sabah School, Oxbridge Academy Baku, Bakı Oxford Məktəbi, Müasir Təhsil Kompleksi, Azərbaycan Britaniya Kolleci, Azərbaycan Beynəlxalq Məktəbi və Bakı Modern Təhsil Kompleksi.
