Ali məktəblərə ixtisas seçimi dövründə abituriyentlərin ən çox ehtiyac duyduğu məqamlardan biri düzgün istiqamət və ekspert tövsiyələridir. "Tehsil365" məsələ ilə bağlı təhsil eksperti Qoşqar Bəylərovun fikirlərini öyrəndi:
- Abituriyentlər seçim zamanı ən çox nəyə diqqət yetirməlidir?
Abituriyent ilk növbədə öz maraqlarına, bacarıqlarına və gələcək hədəflərinə uyğun seçim etməlidir. Yalnız bal uyğunluğu deyil, ixtisasın gələcəkdə verəcəyi imkanlar da nəzərə alınmalıdır. Çünki peşə bir ömürlük yoldaşdır.
- Bu ilki ixtisas seçimində əvvəlki illərlə müqayisədə hansı yeniliklər var?
Bu il bəzi ixtisasların plan yerlərində dəyişikliklər və yeni ixtisaslaşmalar var. Eyni zamanda, süni intellekt, kibertəhlükəsizlik və rəqəmsal texnologiyalar sahəsində yeni proqramlar təqdim olunub.
Həmçinin, bu il ixtisas seçimində bir sıra diqqətçəkən yeniliklər də var. Məsələn, 1-ci qrupda “Data analitikası”, 3-cü qrupda “Dövlət təhlükəsizliyi və idarəetmə”, 4-cü qrupda isə “Dietologiya” ixtisası ilk dəfə olaraq təqdim olunub. Bu yeniliklər əmək bazarındakı tələbləri və müasir trendləri nəzərə alaraq həyata keçirilib. Gənclərə həm dövlət qurumlarında, həm də özəl sektorda perspektivli karyera imkanları qazandıracaq sahələrdir.
- Hazırda daha çox maraq göstərilən ixtisaslar hansılardır və bu marağın səbəbi nədir?
Ən çox maraq göstərilən ixtisaslar sırasında informasiya texnologiyaları, mühəndislik ixtisasları, hüquq, tibb, beynəlxalq münasibətlər və psixologiya var. Bu marağın əsas səbəbləri arasında yüksək əmək haqqı perspektivi, məşğulluq imkanları və cəmiyyətin ehtiyac duyduğu sahələr olması dayanır.
- Valideynlərin seçim prosesində rolu nə qədər vacibdir?
Valideynlərin dəstəyi çox önəmlidir, amma qərar abituriyentin şəxsi maraqlarına əsaslanmalıdır. Valideynlər istiqamət verə bilər, amma təzyiq göstərmək əvəzinə övladlarını dinləmək və motivasiya etmək daha faydalıdır.