"Azərbaycanda son illər xarici dil öyrənməyə olan maraq təkcə fərdi inkişaf ehtiyacı ilə deyil, həm də əmək bazarının tələbləri və ölkənin beynəlxalq inteqrasiya səviyyəsinin yüksəlməsi ilə birbaşa bağlıdır".
Bu barədə "Tehsil365"ə Təhsil İşçilərinin Həmrəyliyi Alyansının (TİHA) sədri, təhsil eksperti Əmrah Həsənli bildirib.
"Bu gün istər dövlət qurumlarında, istər özəl sektorda, istərsə də təhsil sahəsində dil bilikləri artıq əlavə bacarıq deyil, birbaşa işə qəbul şərti kimi önə çıxır. Bu baxımdan, hansı xarici dilin öyrənilməsinin daha məqsədəuyğun olduğu sualı təkcə abituriyentlər üçün deyil, həm də valideynlər, müəllimlər və gələcəyini planlayan gənclər üçün olduqca aktualdır".
"Hazırda ölkəmizdə ən çox hansı dilə tələbat mövcuddur?"
"Hazırda ölkəmizdə ən çox tələbat olan və strateji baxımdan əvəzolunmaz hesab edilən xarici dil, şübhəsiz ki, ingilis dilidir. Dünyada elmin, texnologiyanın, diplomatiyanın və iqtisadi əlaqələrin əsas dili olan ingilis dili Azərbaycanda da bütün sahələr üzrə öndədir. Xüsusilə beynəlxalq təşkilatlarda işləmək, xarici şirkətlərdə karyera qurmaq, ali təhsilin magistratura və doktorantura pillələrində beynəlxalq proqramlarda iştirak etmək, elmi məqalələrə çıxış əldə etmək və xaricdə təhsil almaq üçün bu dilin bilik səviyyəsi artıq baza bacarığı sayılır. Bu gün elə bir sahə yoxdur ki, orada ingilis dilini bilmək üstünlük hesab olunmasın – istər mühəndislik, istər informasiya texnologiyaları, istər hüquq, istərsə də humanitar ixtisaslar",-deyə Təhsil İşçilərinin Həmrəyliyi Alyansının (TİHA) sədri, təhsil eksperti Əmrah Həsənli bildirib.
"Bununla yanaşı, türk dili də ölkəmizdə ən çox istifadə olunan xarici dillərdən biridir. Azərbaycanın Türkiyə ilə sıx iqtisadi, siyasi və mədəni əlaqələri türk dilini müəyyən sahələrdə – xüsusilə media, turizm, biznes və təhsil sahəsində – vacib edir. Ancaq burada qeyd olunmalıdır ki, türk dili ingilis dili kimi universal xarakter daşımır. Bu dili öyrənmək daha çox regional əməkdaşlıq kontekstində faydalı olur və əgər gənc Türkiyə bazarına çıxmaq, orada təhsil almaq və ya çalışmaq istəyirsə, bu dil onun üçün əlverişli seçimdir"
"Son illərdə hansı xarici dil daha çox maraq dairəsindədir?"
"Son illərdə çin dili də xüsusi maraq doğurmaqdadır. Çin Xalq Respublikasının Cənubi Qafqazda, o cümlədən Azərbaycanda iqtisadi layihələrə, logistika və enerji sahələrinə yatırdığı sərmayələr, “Bir kəmər, bir yol” layihəsi və digər strateji planlar bu dilə olan ehtiyacı artırıb. Çin dili qlobal miqyasda mühüm yer tutsa da, bu dili öyrənmək digər dillərlə müqayisədə daha çətin hesab olunur. Lakin gələcəyə yönəlik düşünən və özünü spesifik sahələrdə – məsələn, beynəlxalq ticarət, nəqliyyat-logistika və iqtisadi diplomatiya üzrə inkişaf etdirmək istəyən abituriyentlər üçün bu dil strateji üstünlük təmin edə bilər.
Digər tərəfdən, alman dili də öz aktuallığını qoruyur. Almaniya Avropa İttifaqında iqtisadi baxımdan lider ölkədir və texniki sahələrdə, mühəndislik və tibb üzrə keyfiyyətli təhsil imkanları ilə seçilir. Almaniyada təhsil almağı planlaşdıran gənclər üçün alman dilini öyrənmək həm akademik uğur, həm də iş imkanları baxımından vacibdir. Bundan başqa, Almaniyanın təqdim etdiyi təqaüd proqramlarının böyük əksəriyyəti namizədlərdən dil biliklərini tələb edir", - deyə bildirildi.
"Gələcək üçün ən çox hansı dilə tələbat olacaq?”
"Ərəb və fransız dilləri daha spesifik sahələrdə – məsələn, dini təhsil, beynəlxalq əlaqələr və diplomatiya sahəsində fəaliyyət göstərmək istəyən şəxslər üçün əhəmiyyətlidir. Fransız dili, eyni zamanda BMT-nin və digər beynəlxalq təşkilatların rəsmi dillərindən biri olaraq öz mövqeyini qoruyur. Burada vacib bir məqama da toxunmaq lazımdır – dil seçimi sırf əmək bazarına yönəlməməlidir. Abituriyentlər öz maraq və bacarıqlarını, gələcək planlarını və seçəcəkləri ixtisası da nəzərə almalıdırlar. Məsələn, texniki sahələrə yönəlmək istəyən bir gənc üçün alman dili, beynəlxalq hüquq və ya diplomatiya sahəsinə yönələn biri üçün fransız və ya ərəb dili daha əlverişli ola bilər. Təəssüf ki, bəzən abituriyentlər sadəcə sosial mediada trend olan dillərə və ya dostlarının seçimlərinə əsasən qərar verirlər. Bu isə sonradan dil öyrənmədə motivasiyanın itməsinə, zaman və resurs itkisinə səbəb ola bilər. Ona görə də dil seçimi fərdi maraq, karyera planı və bazar tələbi üçbucağında dəyərləndirilməlidir."
Nəticə olaraq: "Bu gün Azərbaycanda birinci səviyyədə tövsiyə ediləcək xarici dil ingilis dilidir. Onu türk, alman, çin və digər dillər tamamlayır. Amma əsas məsələ dilin nə qədər populyar olması yox, o dili bilən şəxsin bu bilikdən necə istifadə edə bilməsidir. Çünki dil öyrənmək yalnız məqsəd deyil, məqsədə aparan vasitədir",- Təhsil İşçilərinin Həmrəyliyi Alyansının (TİHA) sədri, təhsil eksperti Əmrah Həsənli bildirib.