Bu gün “Şəhidin Səsi” layihəsi çərçivəsində keçirilən çəkiliş zamanı şəhid anası Əsədova Cahan səsləndirdiyi bir iddia diqqət çəkib. O, Gəncədə şəhid övladına aid plakatın hazırlanması üçün onlardan 300 manat məbləğində ödəniş tələb edildiyini bildirib. Məsələ ilə bağlı “Tehsil365” xəbər portalı iddianı araşdırmaq və ictimaiyyətə doğru məlumat çatdırmaq məqsədilə Gəncə Şəhər İcra Hakimiyyətinin Mətbuat xidmətinə sorğu göndərib.
İcra Hakimiyyətinin Mətbuat xidməti ilk olaraq məsələnin təfərrüatlarını öyrənmək üçün iddianı səsləndirən şəxsin əlaqə nömrəsini istəyib. Xəbər portalı tərəfindən Cahan Əsədovanın nömrəsi təqdim edildikdən sonra qurum məsələ ilə bağlı rəsmi açıqlama verib. Bildirilib ki, sözügedən iddia tamamilə əsassızdır və Gəncə şəhərində şəhid ailələrindən plakatların hazırlanması və yerləşdirilməsi üçün hər hansı ödəniş tələb olunmur.
Rəsmi açıqlamada qeyd edilib ki, hazırda Bakı–Qazax avtomagistralının 343,2-ci kilometrliyində “Azəravtoyol” ASC tərəfindən təmir-tikinti işləri aparılır. Bu çərçivədə yolayırıcı arakəsmələrin sökülməsi zərurəti yarandığından, həmin ərazilərdə yerləşdirilmiş şəhid plakatları da müvəqqəti olaraq çıxarılıb. Plakatların götürülməsi şəhid ailələrinin razılığı ilə həyata keçirilib və gələcəkdə həmin görüntülər yeni texnologiyalarla – monitor üzərindən slayd formasında təqdim olunacaq.
Araşdırmanı davam etdirən “Tehsil365” portalı daha sonra yenidən şəhid anası Cahan xanımla əlaqə saxlayıb. O, ilkin çəkiliş zamanı söylədiyi fikrin yanlış anlaşıldığını bildirib. Cahan Əsədova qeyd edib ki, plakatın hazırlanması üçün hər hansı məcburi ödəniş tələbi olmayıb. Onlar şəhid övladının xatirəsini əbədiləşdirmək məqsədilə bu təşəbbüsü özləri irəli sürüb və xərci könüllü şəkildə qarşılayıblar.
Beləliklə, həm Gəncə Şəhər İcra Hakimiyyəti, həm də şəhid ailəsi tərəfindən verilən açıqlamalar sözügedən iddianın əsassız olduğunu ortaya qoyur.