Brüssel – "Education International" təşkilatının mərkəzi ofisinə ilk səfəri zamanı suriyalı təhsil fəalı Nesrin Reşk verdiyi müsahibədə, ölkəsinin şimal-şərq bölgəsindəki təhsil vəziyyəti və qarşılaşdıqları çətinliklərdən danışıb.
"Tehsil365" "ei-ie.org"a istinadən bildirir ki, Hasekedən olan və 2023-cü ildən etibarən Beynəlxalq Əlaqələr Ofisində çalışan Reşk, 2013-cü ildə qurulan Müəllimlər Həmkarlar İttifaqının üzvüdür. Onun sözlərinə görə, hazırda bu bölgədə 5.000 məktəbdə fəaliyyət göstərən 45.000 müəllimdən 40.000-i sendikaya üzvdür.
Nesrin, müharibənin bölgədə böyük dağıntılara səbəb olduğunu bildirir. 5.000 məktəbdən 150-si dağıdılıb, 900.000-dən çox şagird isə təhsillərini qeyri-sabit şəraitdə davam etdirir. Yerindən etmə, psixoloji travmalar və resurs çatışmazlığı təhsildə ciddi problemlər yaradır.
O, beynəlxalq ictimaiyyətin Suriya təhsilinə yetərincə diqqət göstərmədiyini qeyd edərək, sendikanın demokratik təhsil modelini – ana dilində (ərəb, kürd və süryani dillərində) tədrisə keçidi nümunə göstərib. Bu model, Baas rejiminin ideoloji tədris proqramından fərqli olaraq, bölgənin etnik və mədəni müxtəlifliyini əks etdirir.
2023-cü ildə baş verən zəlzələ zamanı göstərilən beynəlxalq yardımın qeyri-bərabərliyini vurğulayan Nesrin, Türkiyəyə göstərilən dəstəyin əksinə olaraq, Suriyanın şimal-şərq bölgəsinin unudulduğunu deyib. Buna baxmayaraq, "Education International" və bəzi təşkilatların göstərdiyi dəstəyin bölgə insanı üçün çox önəmli olduğunu vurğulayıb.
Nesrin Reşk, beynəlxalq həmkarlarını və təşkilatları, şimal-şərqi Suriyanı demokratik və barışçıl bir ölkənin nümunəsi kimi görməyə və bu yolda onları dəstəkləməyə çağırır.