Son zamanlarda ali təhsil müəssisələrində çalışan müəllim və əməkdaşlar eyni sualı təkrar-təkrar verirlər: “Süni intellektdən istifadəm iqlim dəyişikliyinə töhfə verirmi?”
"Tehsil365" Times Higher Education-un yaydığı məlumata əsasən bildirir ki, universitetlərdə ChatGPT, Copilot və Gemini kimi alətlərdən geniş istifadə edilir. Müəllimlər dərs planları hazırlayır, elmi işçilər məqalələri qısalaşdırır, inzibati heyət isə e-poçtlarını idarə etmək üçün süni intellektdən faydalanır. Lakin bu texnologiyaların artan enerji və su istifadəsi bəzi ekoloji narahatlıqlar yaradır.
Böyük Britaniyada fəaliyyət göstərən “Jisc” təşkilatının rəsmisi Cal Innes bildirir ki, süni intellektin ətraf mühitə təsirinə görə fərdi istifadəçiləri günahlandırmaq düzgün deyil. O vurğulayır ki, bu məsələ ilə bağlı əsas məsuliyyət texnologiya şirkətlərinə və onların yaratdığı infrastruktur sistemlərinə aiddir.
Araşdırmalara görə, bir süni intellekt sorğusu təxminən 3 vat-saat enerji sərf edir. Bu, qısa bir videoya baxmaqdan və ya bir neçə dəqiqəlik video zəngdən daha az enerji deməkdir. Mütəxəssislər bu rəqəmlərin təxmini olduğunu desələr də, süni intellektin gündəlik istifadəsinin enerji baxımından o qədər də böyük təsiri yoxdur.
Əsas problem isə böyük texnoloji şirkətlərin qurduğu enerji sərfiyyatlı infrastruktur sistemlərinin özü ilə bağlıdır. Bu baxımdan, fərdi istifadəçiləri günahlandırmaq əvəzinə, süni intellektin inkişafına nəzarət edən qurumlar məsuliyyət daşımalıdır.
Yekunda Innes bildirir ki, süni intellektdən istifadəyə görə günah hissi keçirməkdənsə, onun faydalı tərəflərinə və sistematik dəyişikliklərə fokuslanmaq daha doğrudur.