ABŞ-ın Northwestern Universiteti, Donald Trump administrasiyasının 790 milyon dollarlıq federal vəsaiti dondurması nəticəsində 425 ştat vəzifəsinin bağlandığını elan edib.
"Tehsil365" Chicago Public Media-nın verdiyi məlumata əsasən bildirir ki, universitetin prezidenti Michael Schill, əməkdaşlara göndərdiyi e-poçtda bu qərarın ali məktəbin indiyə qədərki ən sərt qənaət tədbiri olduğunu bildirib.
Bu 425 vəzifənin təxminən yarısı hal-hazırda vakantdır, digər yarısı isə işçilərin işdən çıxarılması deməkdir. İşdən çıxarılanlardan biri yerli mediaya açıqlamasında, "Bu qərarın alınması gözlənilməz oldu, amma aylardır belə xəbərlər dolaşırdı," deyərək, vəziyyətdən hələ də sarsıldığını bildirib.
Prezident Schill qeyd edib ki, personala xərclər universitetin illik büdcəsinin 56%-ni təşkil edir və bu qərar bütövlükdə əmək haqqı büdcəsində təxminən 5%-lik azalma deməkdir. Son aylarda universitet, maliyyə təzyiqlərinə qarşı əlavə tədbirlər də görüb – işə qəbulun dondurulması, illik maaş artımlarının dayandırılması, işçi sığortasında dəyişikliklər və digər əməliyyat xərclərində 10% azalma bu addımlar arasındadır.
Lakin Amerikan Universitet Professorları Assosiasiyasının Northwestern bölməsi universitet rəhbərliyini tənqid edib. Siyasi elmlər professoru Jacqueline Stevens, bu işdən çıxarmaların fakültəyə əvvəlcədən bildirilmədiyini və qərarın “Trump administrasiyasının tələbləri fonunda universitet ictimaiyyətinə qarşı atılmış bir addım” olduğunu deyib.
Schill həmçinin federal səviyyədə universitetlərə qarşı tətbiq edilən təzyiqləri sadalayıb: sağlamlıq xərclərinin artması, hüquqi mübahisələr, beynəlxalq tələbə axınının məhdudlaşdırılması, tədqiqat fondlarına edilən kəsintilər və s.
Northwestern rəhbərliyi dondurulmuş federal fondların tezliklə bərpa ediləcəyinə ümid edir. Bu qərardan təsirlənən digər universitetlər arasında Harvard, Columbia və Cornell də yer alır. Columbia artıq 220 milyon dollardan çox təzminat ödəyərək fondların bir qismini geri ala bilib, Harvard isə 2,6 milyard dollarlıq vəsaiti bərpa etmək üçün hüquqi mübarizə aparır.