Yeni beynəlxalq sorğuya görə, biznes ixtisası üzrə təhsil almaq istəyən beynəlxalq tələbələr ABŞ, Birləşmiş Krallıq, Kanada və Avstraliya kimi ənənəvi istiqamətlərdən uzaqlaşaraq Asiyada yüksələn təhsil mərkəzlərinə yönəlməyə başlayıblar. Bu dəyişikliyin əsas səbəbləri arasında sərt viza qaydaları, qeyri-müəyyən məzuniyyət sonrası iş imkanları və siyasi qeyri-sabitlik göstərilir.
"Tehsil365" AACSB-nin (Beynəlxalq Biznes Məktəbləri Assosiasiyası) sorğusuna istinadən xəbər verir ki , iştirakçıların 67%-i son qanun və siyasət dəyişikliklərinin beynəlxalq tələbələrin qeydiyyatına mənfi təsir etdiyini bildirib. ABŞ regionunda bu təsirlər daha güclü hiss olunur – respondentlərin 84%-i ciddi dəyişikliklər yaşadıqlarını qeyd edib. Avropada bu göstərici 33%, Asiya-Sakit okean regionunda isə 40%-dir.
Assosiasiyanın rəhbəri Lili Bi qeyd edib ki, “tələbələrin axını hökumət siyasətlərinə həssas reaksiya verir – açıq siyasət yürüdən ölkələrdə qeydiyyat artır, məhdudlaşdırıcı rejimlərdə isə azalır”.
Xüsusilə Çin, Hindistan, Sinqapur, Cənubi Koreya və Malayziya kimi ölkələr vizaları asanlaşdırmaq, ingiliscə tədris proqramlarını artırmaq və təqaüd imkanlarını genişləndirməklə beynəlxalq tələbələr üçün cazibədar mərkəzə çevrilir. Bununla yanaşı, bu ölkələrdə həyatın daha ucuz olması da tələbələrin seçimlərinə təsir edir.
Almaniya da diqqət çəkən ölkələr sırasındadır. Burada “Bacarıqlı İşçi Qüvvəsi Təşəbbüsü” və “Beynəlxalq İstedadlar üçün Kampus” proqramları çərçivəsində beynəlxalq tələbələrin iş bazarına inteqrasiyası dəstəklənir. Alman hökuməti bu məqsədlə 120 milyon avro vəsait ayırıb və 2025-ci ilə qədər xarici tələbə sayını 7% artırmağı planlaşdırır.
Mütəxəssislər bildirirlər ki, tələbə axını artıq lüks deyil, strateji dəyər sayılır və bu dəyişikliklər qlobal təhsil mühitində yeni güc mərkəzlərinin meydana çıxdığını göstərir.