Tədqiqatçı Elliot Haspelin "Bir Ulus Yetişdirmək" adlı yeni kitabı, uşaq baxımının ABŞ-da unudulmuş, lakin həyati əhəmiyyət daşıyan bir dəyər olduğunu iddia edir. Haspelə görə, bu sahəyə cəmiyyətin ümumi rifahı naminə, şəxsi valideynlik statusundan asılı olmayaraq yanaşmaq lazımdır.
"Tehsil365" The Hechinger Report-a istinadən bildirir ki, kitabda uşaq baxımının əhəmiyyətini sübut edən 10 arqument yer alır. Haspel, bu xidməti iqtisadi sabitlik, demokratik institutlar və milli təhlükəsizlik üçün vacib sayır. O bildirir ki, ABŞ-da uşaq baxımı artıq bir çox ştatda universitet təhsili və kirayə haqqından daha baha başa gəlir. Bu isə illərdir davam edən bir problemdir və hökumətlərin konkret tədbir görməməsi vəziyyəti daha da dərinləşdirib.
Haspelin təqdim etdiyi arqumentlər arasında “İqtisadi əsaslandırma” və “Vətənpərvərlik arqumenti” xüsusilə seçilir. O qeyd edir ki, uşaq baxımının olmaması iş qüvvəsinin daralmasına, polis və digər xidmət sahələrində işçi çatışmazlığına, həmçinin sosial qeyri-bərabərliyin dərinləşməsinə səbəb olur. Colorado ştatının Montrose şəhərində uşaq baxımının olmaması səbəbindən polis əməkdaşlarının tapılmaması və bu səbəbdən cinayət göstəricilərinin artması buna nümunə kimi göstərilir.
Haspelin fikrincə, uşaq baxımı məktəblər, kitabxanalar və parklar kimi ictimai infrastrukturun bir hissəsi sayılmalıdır. Onun sözlərinə görə, “Yüksək keyfiyyətli uşaq baxımı ailənin şəxsi məsuliyyəti deyil, ictimai öhdəlik kimi qəbul edilməlidir.”
Kitab əsasən problemin dərin səbəblərinə fokuslanır. Amma Haspel çıxış yolları da təqdim edir: uşaq baxıcısı kimi çalışanlara layiqli maaş vermək, evdə qalan valideynləri və qeyri-rəsmi baxıcıları dəstəkləmək, məktəbəqədər və yay baxımı xidmətlərini sistemə daxil etmək. O, bu addımların ABŞ-ın milli dəyərləri ilə tam uyğun olduğunu vurğulayır.