Güney Pasifik Universitetində (USP) təhsilin ticariləşdirilməsinə qarşı müəllim və tələbələr ayağa qalxıb. 12 ölkəyə məxsus olan və Avstraliya ilə Yeni Zelandiyanın da dəstəyini alan USP, son illərdə xərcləri azaltmaq üçün əsas diqqəti onlayn təhsilə yönəldib. Bu dəyişiklik, həm tədris keyfiyyətinə, həm də əməkdaşların iş şəraitinə mənfi təsir edib.
"Tehsil365" "ei-ie.org"un yaydığı məlumata əsasən xəbər verir ki, onlayn təhsilə keçidlə birlikdə tam ştatlı müəllimlərin əvəzinə, az maaşla çalışan və adətən regiondan uzaqda yaşayan yarımştat müəllimlər cəlb olunmağa başlayıb. Bu isə işçi heyətində iş yükünün ədalətsiz bölünməsi və əmək şəraitinin pisləşməsi ilə nəticələnib. Tələbə sayı və universitet gəlirlərinin azalması da bəzi fakültələrin büdcəsinin ixtisarı ilə müşayiət olunub.
Texnoloji infrastrukturun zəifliyi səbəbindən regionda onlayn təhsil tələbələrin ehtiyaclarını qarşılamır. Həm müəllimlər, həm də tələbələr bu yeni sistemin tədris keyfiyyətinə zərər verdiyini və sosial bərabərsizliyi dərinləşdirdiyini vurğulayır.
2024-cü ilin oktyabrında universitet müəllimlərinin təşkilatlandığı AUSPS həmkarlar ittifaqı dörd günlük tarixi tətil elan edib. Tələblər arasında Rektor müavininin vəzifədən kənarlaşdırılması, bölgədən olan işçilərin saxlanılması, qadınların rəhbər vəzifələrdə təmsilçiliyinin artırılması, əmək haqqı üzrə danışıqların aparılması və iş yükünün balanslaşdırılması var idi.
Təzyiqlər nəticə verib: Universitet Şurası bir sıra məsələlərə müsbət yanaşaraq əməkhaqqı danışıqlarına başlayıb, geriyə dönük maaşlar ödənilib və tərəflər arasında dialoq bərpa olunub. Bundan əlavə, Şura yeni Pro-Rektor seçib və rəhbərliyin səlahiyyətləri ilə bağlı yaranmış narazılıqları həll etmək üçün xüsusi müşahidəçi təyin edib. Həmçinin, haqsız şəkildə işdən çıxarılan Dr. Tamara Osborne-un məsələsi üzrə müstəqil araşdırma başlanılıb.