Tehsil365 xəbər verir ki, 2024/2025-ci tədris ili üçün Azərbaycan universitetlərində ödənişli əsaslarla təhsil haqları müəyyən edilib. Məlumata əsasən, ali təhsil müəssisələrində təhsil haqqı ixtisas və universitetin statusundan asılı olaraq dəyişir.
Elm və Təhsil Nazirliyi, ali məktəblərin rəsmi saytları və açıq məlumat platformalarına istinadla aparılan araşdırmalar nəticəsində məlum olub ki, dövlət universitetlərində təhsil haqları orta hesabla 1 800–2 700 manat arasında dəyişir. Özəl və beynəlxalq statuslu ali təhsil müəssisələrində isə bu göstərici 3 000–8 500 manat aralığındadır.
Dövlət universitetlərində vəziyyət
Dövlət ali məktəblərinin əksəriyyətində təhsil haqlarında dəyişiklik edilməyib. Məsələn, Bakı Dövlət Universitetində əksər ixtisaslar üzrə təhsil haqqı 1 900–2 500 manat, hüquq ixtisası üzrə isə 4 500 manata qədər müəyyən olunub. Azərbaycan Dövlət Neft və Sənaye Universitetində bakalavriat səviyyəsində təhsil haqqı 2 000–2 500 manat, magistratura pilləsində isə 2 500–3 000 manat təşkil edir.
Azərbaycan Dövlət Pedaqoji Universitetində ötən illə müqayisədə təhsil haqlarında artım müşahidə olunub. Belə ki, bakalavriat səviyyəsində təhsil haqqı 2 000 manatdan 2 300 manata, magistraturada isə 2 400 manata qaldırılıb.
Azərbaycan Dillər Universitetində xarici dil ixtisasları üzrə təhsil haqqı 2 500–2 700 manat, UNEC-də isə iqtisadiyyat və idarəetmə sahələri üzrə 2 200–2 700 manat civarında müəyyən olunub.
Özəl və beynəlxalq statuslu universitetlər
Ölkədə fəaliyyət göstərən özəl ali təhsil müəssisələrində ödənişlər nisbətən yüksəkdir. Xəzər Universitetində illik təhsil haqqı 4 000–5 000 manat, Qərbi Kaspi Universitetində isə 2 500–3 500 manat arasında dəyişir.
ADA Universitetində isə ixtisasdan və təhsil pilləsindən asılı olaraq yerli tələbələr üçün təhsil haqqı 6 000–8 000 manat, xarici tələbələr üçün isə 8 500 manatdan başlayır.