Azərbaycan Dillər Universiteti ilə Qazaxıstan Respublikasının Hoca Ahmet Yesevi Beynəlxalq Universiteti arasında imzalanmış Anlaşma Memerandumu çərçivəsində filologiya fakültəsinin (ingilis) yaz smestrində təhsil alan Nurbike Bostancıoğlu burada keçirdiyi dövrün onun üçün həm fərdi, həm də akademik baxımdan son dərəcə faydalı olduğunu bildirir.
“Tehsil365” ADU’a əsasən bildirirki, Azərbaycana ilk gəlişindən danışan Nurbike Bostancıoğlu təəssüratlarını belə bölüşür:
"İnsanların qonaqpərvərliyi və mehribanlığı məni çox sevindirdi. Bakı şəhəri öz gözəlliyi və tarixi ilə məni heyran etdi. Universitetdə isə müəllim və tələbələrin dostyana münasibəti məni çox rahatlatdı."
Azərbaycan Dillər Universitetində aldığı təhsildən məmnunluğunu bildirən Nurbike dərslərin interaktivliyi və müəllimlərin tələbələrin fikirlərinə verdiyi dəyəri yüksək qiymətləndirir:
"Ən çox bəyəndiyim cəhətlərdən biri dərslərin maraqlı və interaktiv şəkildə aparılmasıdır. Beynəlxalq tələbələr üçün təşkil olunan tədbirlər də xüsusi zövq verir."
O, Azərbaycan mədəniyyəti ilə ilk tanışlığının da maraqlı keçdiyini vurğulayır:
"Novruz bayramını ilk dəfə Bakıda qeyd etdim. Səməni, tonqallar, milli şirniyyatlar və bayramın ümumi abu-havası mənim üçün unudulmaz oldu. Milli mətbəxin ləzzəti isə ayrıca təəssürat yaratdı."
Azərbaycan Dillər Universitetində qazandığı təcrübənin gələcək planlarında önəmli rol oynayacağını qeyd edən tələbə bildirib:
"Buradakı təhsil və mədəni mühit dünya görüşümü genişləndirdi. Fərqli mədəniyyətləri tanımaq və anlamaq bacarığım artdı. Gələcəkdə beynəlxalq əlaqələr sahəsində çalışmaq istəyirəm və buradakı təcrübəm bu yolda mənə böyük dəstək olacaq."
Sonda universitetimizlə bağlı təəssüratlarını paylaşan Nurbike Bostancıoğlu ADU-nu digər beynəlxalq tələbələrə də tövsiyə etdiyini deyir:
"Azərbaycan Dillər Universiteti beynəlxalq tələbələr üçün çox əlverişli bir mühit yaradır. Yüksək səviyyəli təhsil və dostcanlı atmosfer burada təhsil almağı həm akademik, həm də şəxsi inkişaf baxımından əla fürsətə çevirir."