Bakı Mühəndislik Universitetində (BMU) Koreyanın İNHA Universiteti ilə imzalanmış saziş çərçivəsində iqlim böhranına həsr olunmuş hakatonun iştirakçıları ilə görüş keçirilib. Sazişə əsasən, koreyalı və azərbaycanlı tələbələrdən ibarət 6 komanda yaradılıb, onlar iqlim dəyişikliyi mövzusunda birgə layihələr hazırlayıblar.
“Tehsil365” BMU’a əsasən xəbər verirki, görüşdə BMU-nun rektoru Yaqub Piriyev beynəlxalq əməkdaşlığın əhəmiyyətini vurğulayıb, tələbələrin dünyagörüşünün və liderlik bacarıqlarının inkişafına töhfə verdiyini bildirib. O, həmçinin ölkəmizin iqlim dəyişiklikləri ilə mübarizədə gördüyü işlər və COP29 tədbirinin Bakıda keçirilməsinin əhəmiyyətindən danışıb.
Yekun yarışmanın qalib komandasına sertifikatlar təqdim olunub. Qaliblər Koreyaya səfər edərək ekoloji təlimlərdə iştirak edəcəklər. Görüşdə, həmçinin BMU və İNHA Universiteti arasında ikili diplom proqramının 2030-cu ilədək uzadıldığı da qeyd olunub.