Bakı Dövlət Universitetində (BDU) “Açıq qapı” günləri çərçivəsində universitetin rektoru Elçin Babayev abituriyentlərlə görüş keçirib.
“Tehsil365” BDU’a əsasən xəbər verirki, rektor sentyabrın 1-də 106 yaşını qeyd edəcək BDU-nun hər daşının tarix olduğunu bildirib. O qeyd edib ki, düzgün universitet seçimi uğura aparan əsas mərhələlərdən biridir və hər insan öz uğur hekayəsini özü yazır. Elçin Babayev universitetin məzunları sırasında ümummilli lider Heydər Əliyev, dövlət və hökumət nümayəndələri, Milli Məclis üzvlərinin olduğunu vurğulayıb. Bildirilib ki, bu günədək BDU ölkə üçün 200 mindən çox yüksək ixtisaslı mütəxəssis yetişdirib. Universitet beynəlxalq reytinqlərdə yalnız Azərbaycanda deyil, Cənubi Qafqazda da lider mövqedədir.
Tədbirdə həmçinin qeyd olunub ki, 1919-cu ildə Tarix-filologiya və Tibb fakültələri ilə fəaliyyətə başlayan universitetdə hazırda 16 fakültə fəaliyyət göstərir. Bunların 8-i humanitar, 8-i isə təbiət yönümlüdür. Müasir dövrün və əmək bazarının tələblərinə uyğun yeni ixtisaslar yaradılır, elmi tədqiqatlar aparılır.
Görüş zamanı rektor abituriyentlərə uğurlar arzulayıb, onları BDU ailəsinin üzvü olmağa dəvət edib. Sonda Elçin Babayev abituriyent və valideynlərin suallarını cavablandırıb.