Səudiyyə Ərəbistanı Krallığında fəaliyyət göstərən Kral Salman adına Beynəlxalq Ərəb Dili Akademiyasının təşəbbüsü ilə avqust ayı Azərbaycanda “Ərəb dili ayı” elan edilib. Bu münasibətlə ərəb dilinə maraq göstərənlər üçün müxtəlif tədbir və müsabiqələrin keçirilməsi nəzərdə tutulur.
“Tehsil365” BDU’a əsasən xəbər verirki, ayın ilk həftəsində ərəb dili üzrə şeir, qiraət və inşa müsabiqələri təşkil olunacaq. Bu müsabiqələrdə Azərbaycanda ərəb dili öyrənən hər kəs iştirak edə bilər. Bu, dil bacarıqlarını nümayiş etdirmək və mədəniyyətlərarası ünsiyyətə töhfə vermək istəyənlər üçün əla fürsət olacaq.
Avqustun 18–22-si tarixlərində “Ərəb dili ayı” çərçivəsində ən önəmli tədbir Bakı Dövlət Universitetində keçiriləcək. Kral Salman adına Beynəlxalq Ərəb Dili Akademiyasının baş direktoru professor Abdulla Əl-Vaşmi və onu müşayiət edən nümayəndə heyətinin iştirakı ilə rəsmi açılış mərasimi baş tutacaq.
Tədbirdə Azərbaycan Respublikasının Xarici İşlər Nazirliyi, Elm və Təhsil Nazirliyi, Mədəniyyət Nazirliyi, ölkəmizdə akkreditə olunmuş ərəb ölkələrinin səfirliklərinin nümayəndələri, eləcə də ISESCO və digər beynəlxalq təşkilatların təmsilçilərinin iştirakı nəzərdə tutulur.
Bundan əlavə, avqustun 18-də ərəb dili üzrə beynəlxalq forum keçiriləcək. Forumda müxtəlif ölkələrdən dəvət olunmuş qonaqlar və Azərbaycanın tanınmış ərəbşünas alimləri çıxış edəcəklər.