Ənənəvi dəyərlərin qorunması cəmiyyətin mənəvi sabitliyi və kimliyinin davamlılığı baxımından mühüm əhəmiyyət daşıyır. Bu baxımdan dini qurumların rolu və onların fəaliyyətinə yanaşma xüsusi diqqət tələb edir.
“ Tehsil365 ” xəbər verir ki,Dini qurumlar cəmiyyətdə ənənəvi dəyərlərin qorunub saxlanması və inkişaf etdirilməsi vəzifələrini yerinə yetirir. Bunu nəzərə alaraq iddia edilir ki, ənənəvi dinlər cəmiyyətdə yeni yayılmağa başlamış dinlərə nisbətən daha çox hüquqlara malik olmalıdır. Çünki ənənəvi dinlər dayanıqlı maddi bazaya və güclü təşkilati struktura malik olan qeyri-ənənəvi dinlərlə bərabər rəqabət aparmaq imkanına malik deyil. Bu isə yalnız dini deyil, eyni zamanda ictimai təhlükəsizlik və sosial stabillik məsələsidir. Bu da keçid dövrü cəmiyyətlərinin sosial-dini strukturuna ciddi zərbə vura bilər.
Beləliklə, sadəcə, dövlətin ənənəvi dinləri dəstəkləyici siyasəti cəmiyyətdə mövcud olan ənənəvi dəyərlərin qorunub saxlanması, dini qrupların təbliğata yönəlmiş fəaliyyəti arasındakı tarazlığı təmin edə bilər. Bu yanaşma həm də dini müxtəlifliyin məqbul çərçivədə tənzimlənməsinə kömək edə bilər. Xüsusilə qeyd edilməlidir ki, kommunist rejimlərin siyasəti ənənəvi dinlərin maliyyə və təşkilati strukturunu, demək olar ki, aradan qaldırmışdı. Bu səbəbdən, bir çox keçid dövrü cəmiyyətlərində qeyri-ənənəvi dinlərin fəaliyyəti qanunda nəzərdə tutulmuş çərçivədə bu və ya digər dərəcədə məhdudiyyətlərə məruz qalır. Bu isə dövlətlərin dini təhlükəsizlik və milli kimlik məsələsində həssas davranmağa məcbur qaldığını göstərir.