Təhsil və müəllimlik cəmiyyətin inkişafında mühüm rol oynayan əsas sahələrdəndir. İslam dini bu sahələrə xüsusi önəm verərək həm elmi, həm də əxlaqi dəyərləri birlikdə təbliğ edir.
“ Tehsil365 “ xəbər verir ki,İslam dini tarix boyu elmə, təhsilə və müəllimlik peşəsinə böyük önəm vermişdir. İslamda müəllimlərin qarşısında çox ciddi tələblər qoyulur. Onlar yalnız biliyi ötürən şəxslər deyil, həm də yüksək əxlaqi və mənəvi keyfiyyətlərə sahib olmalıdırlar. Müəllim daim öz üzərində çalışmalı, biliyini artırmalı, tələbələrə qarşı ədalətli və səbirli davranmalı, şagird və tələbələri ilə xoş münasibət qurmalıdır. Hirsə və şiddətə yol verməmək İslam müəlliminin əsas xüsusiyyətlərindən biridir. Peyğəmbərimiz (s.ə.v) də bilik verənlərlə bilik alanlar arasında mehribanlıq və səbirli olmağı vacib saymışdır.
İslam dini elmi, biliyi və təhsili mənəvi sərvət kimi dəyərləndirir və insanları elm öyrənməyə, elmi başqaları ilə bölüşməyə təşviq edir. Bilik paylaşımı İslamda böyük savab hesab edilir. Hədislərdə deyilir ki, "Bilik bilməyənlər arasında yaymaq ən böyük sədəqədir" və "Elm Çində də olsa, dalınca gedin". Bu sözlər göstərir ki, İslam dini elm axtarışında heç bir zaman, məkan, cins və dil fərqi qoymur.
Azərbaycanda İslamın yayılması ilə birlikdə dini təhsil müəssisələri də inkişaf etmişdir. Gəncə, Şamaxı kimi böyük şəhərlərdə məscidlərin nəzdində məktəblər və mədrəsələr yaradılmışdır. Məsələn, Şamaxının məşhur "Məlhəm" mədrəsəsi həm dini elmlərin, həm də tibb, anatomiya, əczaçılıq, riyaziyyat, məntiq kimi müxtəlif sahələrin tədris olunduğu elmi mərkəz olmuşdur.
Ümumilikdə İslam dini elm və bilik axtarışını iman üçün əsas amil hesab edir və bu yolda olan hər kəsi təşviq edir. Müəllimlik peşəsi isə yalnız bilik vermək deyil, eyni zamanda yüksək mənəvi dəyərləri daşımaq və gələcək nəsillərə ötürmək vəzifəsidir. Bu baxımdan, İslam dini təhsil və müəllimlik sahəsində müasir cəmiyyət üçün də aktual dəyərlər və nümunələr təqdim edir.