Dövlət Statistika Komitəsinin məlumatına görə, elmi-texniki potensialın gücləndirilməsi istiqamətində ölkədə doktorantura təhsilinə maraq davam edir. 2024-cü ilin əvvəlinə olan göstəricilərə əsasən, 114 ali və elmi təhsil müəssisəsində fəaliyyət göstərən doktoranturalarda ümumilikdə 3304 nəfər təhsil alır. Onların 50,2 faizi qadınlardır.
Təhsil alanların 82,5 faizi fəlsəfə doktoru, 17,5 faizi isə elmlər doktoru proqramı üzrə oxuyur. Fəlsəfə doktoru proqramında oxuyanların 57 faizi 30 yaşadək, elmlər doktoru proqramında isə 28,4 faizi 40 yaşadək şəxslərdir.
Müəssisələr üzrə bölgüyə gəlincə, doktorantların 68,4 faizi ali məktəblərdə, 31,6 faizi isə elmi müəssisə və təşkilatlarda təhsil alır.
Fəlsəfə doktoru proqramı üzrə ən çox təmsil olunan ixtisaslar:
Texnika – 563 nəfər
İqtisad – 550 nəfər
Filologiya – 246 nəfər
Elmlər doktoru proqramı üzrə isə:
Filologiya – 134 nəfər
İqtisad – 70 nəfər
Texnika – 65 nəfər
2023-cü illə müqayisədə, 2024-cü ildə fəlsəfə doktoru proqramı üzrə buraxılış 18,4 faiz azalaraq 500 nəfər, elmlər doktoru proqramı üzrə isə 10,8 faiz artaraq 133 nəfər təşkil edib. Cari ildə doktoranturaya qəbul müvafiq olaraq 758 və 106 nəfər olub.
Bundan əlavə, 2024-cü ildə fəlsəfə doktoru proqramı üzrə 157 dissertant, elmlər doktoru proqramı üzrə isə 231 dissertant təhkim olunub. Dissertantların böyük hissəsi tibb, biologiya, tarix, iqtisad və texnika sahələrini əhatə edir. Fəlsəfə doktoru üzrə təhkim olunan dissertantların 77,1 faizi qadınlardır.