İnsanların çoxu itlərin instinktinə güvənir – əgər bir köpək sizə canla yaxınlaşırsa, sizi etibarlı biri kimi görürlər; əksinə, əgər köpək sizdən çəkinirsə, bəziləri xarakterinizi sorğulamağa başlayır. Lakin itlərin insanları sosial baxımdan qiymətləndirə bilməsi məsələsi hələ də elmdə müzakirə mövzusudur.
"Tehsil365" Avstriyadakı Kurt Elmi Mərkəzində aparılan əvvəlki tədqiqatlara istinadən xəbər verir ki, sürü halında yaşayan itlərin və canavarların, insanlarla birbaşa və ya dolayı təmasdan sonra onların “etibarını” formalaşdırmadığını göstərmişdi. Bu isə onların insanlarla məhdud sosial təcrübələri ilə izah olunurdu.
Yeni bir araşdırmada isə alimlər, ev şəraitində yaşayan 40 it üzərində təcrübə apararaq yaş və inkişafın bu qərarverməyə təsirini araşdırıblar. İtlər əvvəlcə başqa bir itin iki insanla qarşılıqlı münasibətini izləyiblər – bu şəxslərdən biri onu yemləyib, digəri isə yox. Daha sonra həmin itlər özləri bu iki insanla birbaşa təmasda olublar.
Gözləntilərin əksinə olaraq, itlər yem verən insanı digəri ilə müqayisədə əhəmiyyətli dərəcədə üstün tutmayıb. Nə müşahidə, nə də birbaşa təmas onların hansısa “müsbət reputasiyaya” üstünlük verməsinə səbəb olmayıb.
Tədqiqatın müəlliflərindən biri, Kyoto Universitetindən Hoi-Lam Jim bildirib ki, bu nəticələr itlərin sosial qiymətləndirmə bacarığının əvvəl düşünüldüyündən daha mürəkkəb olduğunu göstərir. Onun sözlərinə görə, nəticələrin bu qədər qeyri-müəyyən olması, metodoloji çətinliklər və iki seçimli test formatından da qaynaqlana bilər.
Alimlər hesab edir ki, bu sahədə daha dəqiq nəticələr üçün fərqli yaş, həyat təcrübəsi və sosial mühitə sahib – məsələn, sərbəst yaşayan, xidmət və polis itləri kimi – müxtəlif it qrupları ilə geniş tədqiqatlar aparılmalıdır.