Yeni yayılan hesabat göstərir ki, süni intellekt sahəsində təhsil almaq istəyənlərin sayı sürətlə artmaqdadır, lakin bu tələbin çox az hissəsi ali təhsil müəssisələri tərəfindən qarşılanır.
"Tehsil365" İnside Higher Ed-un yaydığı məlumata istinadən xəbər verir ki, Validated Insights şirkətinin araşdırmasına əsasən, ABŞ-da təxminən 57 milyon insan süni intellektə əsaslanan bacarıqları öyrənmək istəyir, onlardan yalnız təxminən 8,7 milyonu hazırda bu sahədə təhsil alır. Bu tələbələrin üçdə ikisi özbaşına video, onlayn mətn və digər mənbələr vasitəsilə öyrənirsə, təxminən üçdə biri isə strukturlaşdırılmış proqramlarda iştirak edir. Lakin yalnız 7 min nəfər (cəmi 0,2%) ali təhsil müəssisələrinin kreditli proqramları vasitəsilə süni intellekt öyrənir.
Hesabatda qeyd edilir ki, ilk süni intellekt üzrə bakalavr proqramı 2018-ci ildə Carnegie Mellon Universitetində yaradılıb və son beş ildə universitetlərdə bu sahəyə maraq ildə 45% artıb. Təxminən universitetlərin 1%-i magistratura, 2,5%-i bakalavr və 3-5%-i isə sertifikat proqramları təklif edir.
Məsələn, New York ştatındakı Buffalo Universitetinin süni intellekt magistratura proqramına tələbə sayı 2020-dən 2024-ə qədər 5-dən 103-ə yüksəlib.
Validated Insights-in tədqiqat direktoru Brady Colby bildirir ki, süni intellekt üzrə təhsil və peşə hazırlığı sahəsində tələb çox böyükdür və bu bazar gələcəkdə sürətli inkişaf potensialına malikdir.
Eyni zamanda, təhsil texnologiyaları sahəsində fəaliyyət göstərən şirkətlər Coursera və Udemy kimi platformalarda təklif olunan süni intellekt kurslarına marağın artdığını göstərir. ChatGPT-nin istifadəyə verilməsindən 14 ay sonra bu kurslara yazılanların sayı 3,5 milyona çatıb.
Colby əlavə edir ki, ali məktəblərdə kreditli proqramlarda tələbələrin azlığı həm xəbərdarlıq, həm də fürsət kimi qiymətləndirilməlidir. Əgər universitetlər proqramlarını tələbə marağı ilə uzlaşdıra bilsələr, həm tələbələr, həm də məktəblər üçün böyük faydalar ola bilər.
Statista-nın proqnozuna görə, ABŞ-da süni intellektə dair təhsil bazarının dəyəri 2025-ci ildə 74 milyard dolları ötəcək.