Amerikanın “Preventive Medicine” jurnalında dərc olunan yeni araşdırma, gündəlik sürətli gəzməyin, xüsusilə aşağı gəlirli və afroamerikan əhalisi arasında, ölüm riskini əhəmiyyətli dərəcədə azaltdığını sübut edir.
"Tehsil365" Sience Daily-ə istinadən xəbər verir ki, Vanderbilt Universitetindən baş tədqiqatçı Dr. Vey Ceng bildirir ki, gündə cəmi 15 dəqiqə sürətli gəzmək ümumi ölüm riskini təxminən 20% azalda bilər. Araşdırmada 79,856 nəfər iştirak edib və onların gündəlik gəzmək sürəti və müddəti qeyd olunub. Nəticələr göstərib ki, sürətli gəzmək həm ürək-damar xəstəliklərində, həm də digər ölüm səbəblərində qoruyucu təsir göstərir.
Sürətli gəzməyin faydaları, digər həyat tərzi faktorlarından asılı olmayaraq, bütün yaş və gəlir qruplarında özünü göstərib. Tədqiqatçılar vurğulayırlar ki, aşağı gəlirli qruplarda yürüş üçün təhlükəsiz yerlərin azlığı, pis qidalanma, siqaret və spirt istifadəsi kimi faktorlar ölüm riskini artırır. Buna görə, sürətli gəzməyi təşviq edən sağlamlıq proqramları bu qruplar üçün xüsusi əhəmiyyət daşıyır.
Sürətli gəzməyin ürəyə faydaları isə belədir: ürək dövranını yaxşılaşdırır, oksigen daşınmasını artırır, bədən çəkisini nəzarətdə saxlayır, obezlik və hipertoniya kimi xəstəliklərin riskini azaldır.
Araşdırmanın baş müəllifi Lili Liu bildirir ki, sürətli gəzməyi dəstəkləyən ictimai sağlamlıq kampaniyaları və proqramlar insanların həyat keyfiyyətini yüksəltmək üçün vacibdir. Hər kəsə, xüsusilə orta və aşağı gəlirli qruplara tempolu yürüş və digər aerobik fəaliyyətləri gündəlik rejimə daxil etmələri tövsiyə olunur.