Son illərdə ölkəmizdə müəllimlərin sertifikatlaşdırılması prosesi geniş müzakirə olunan mövzulardan birinə çevrilmişdir. Təhsil sistemində keyfiyyətin artırılması məqsədilə həyata keçirilən bu proses bir tərəfdən müəllimlərin peşəkar inkişafına təkan verməyi hədəfləsə də, digər tərəfdən bəzi narazılıqlara səbəb olmuşdur.
Sertifikatlaşdırma müəllimin real peşə bacarıqlarını və ümumi pedaqoji keyfiyyəti nə dərəcədə düzgün ölçür?
Bu barədə “Tehsil365”ə təhsil eksperti Ramin Nurəliyev açıqlamasında bildirib ki, sertifikasiya imtahanı, ümumiyyətlə, orta ümumi təhsil məktəblərində tədris prosesini həyata keçirən müəllimlərin ölçü meyarı kimi nəzərdə tutulur:
“Sertifikasiya müxtəlif nümunələrlə beynəlxalq təcrübələrdə də öz əksini tapıb. Eləcə də Türkiyədə sertifikasiya imtahanına bənzər imtahanlar müəllimlərə tətbiq olunur və müəllimlər bu imtahandan müsbət nəticə əldə etdikləri təqdirdə pedaqoji fəaliyyətlərini davam etdirirlər. Azərbaycanda da bu qayda tətbiq olunur.
İmtahanda 50 %-dən yuxarı nəticə əldə edən müəllimlər pedaqoji fəaliyyətlərini davam etdirirlər. 50 %-dən aşağı nəticə göstərən müəllimlərə Elm və Təhsil Nazirliyi tərəfindən 1 il möhlət verilir. Bu müddət ərzində müəllim təkrar hazırlaşaraq sertifikasiya imtahanında iştirak edir. Əgər təkrar imtahanda da müəllim 50 %-dən aşağı nəticə göstərərsə, o zaman onun əmək müqaviləsinə xitam verilir və müəllim orta ümumi təhsil məktəbinin pedaqoji fəaliyyətindən kənarlaşdırılır”.
Ramin Nurəliyev əlavə edib ki, sertifikasiya imtahanı müəllimin bilik və bacarığını ölçür:
“Çünki müəllim başqa fəndən imtahan vermir. Əgər müəllim öz ixtisası üzrə orta ümumi təhsil məktəbində dərs deyirsə, ona təqdim olunan sertifikasiya suallarını da rahat şəkildə cavablandırmalıdır. Buna görə də müəllimlər minimum 50 %-dən yuxarı nəticə əldə etməlidirlər. Çünki şagird qarşısına çıxan müəllim, şagirdə öyrədəcəyi ixtisası mükəmməl şəkildə bilməlidir”.
Ekspert son olaraq bildirib ki, ümumilikdə, bu ilki sertifikasiya imtahanlarına nəzər saldıqda, təhsil müəssisələrində ciddi problemlərin mövcud olduğunu müşahidə etdik:
“Müəllimlərin 30-40 %-i 50 %-dən aşağı nəticə göstərib. Ümumiyyətlə, sertifikasiya imtahanı gələcəyə hesablanan bir prosesdir. Gələcəkdə biz orta ümumi təhsil məktəblərində həm şagirdlərin, həm də müəllimlərin peşəkarlığının artdığının şahidi olacağıq. Həmçinin məktəb psixoloqlarının da sertifikasiya imtahanına cəlb olunması vacibdir”.
