2 avqust – Azərbaycan Kinosu Günü münasibətilə təşkil edilən silsilə tədbirlər çərçivəsində Azərbaycan Dövlət Film Fondunda infotur və film nümayişi uğurla baş tutub.
“Tehsil365” xəbər verir ki , Azərbaycan Dövlət Film Fondunda mədəniyyət könüllüləri və tələbələrin iştirakı ilə təşkil olunan tədbirin ilk hissəsində iştirakçılar üçün infotur həyata keçirildi. Tur zamanı qonaqlar Film Fondunun fəaliyyəti ilə yaxından tanış oldular, Azərbaycanın kino irsini əks etdirən nadir arxiv materiallarına baxış keçirdilər. Gənclərə Fondun arxiv bazası, filmlərin bərpa prosesi, saxlanma şəraiti və bu sahədə aparılan elmi-tədqiqat işləri haqqında ətraflı məlumat verildi. Kino sahəsinə marağı olan tələbələr bu prosesləri yerində izləmək imkanı qazandılar və Fondun əməkdaşları tərəfindən verilən maarifləndirici məlumatları dinlədilər.
Tədbirin növbəti hissəsi Film Fondunun nümayiş zalında davam etdi. Azərbaycan Respublikasının Əməkdar incəsənət xadimi, Fondun direktoru Cəmil Quliyev çıxış edərək 2 avqust tarixinin Azərbaycan kinematoqrafiyası üçün daşıdığı tarixi və mənəvi əhəmiyyətə toxundu. O, milli kinematoqrafiyanın keçdiyi inkişaf yolundan, bu gün qarşıda duran çağırışlardan və gənclərin bu sahədə artan rolundan danışdı. Gənclərə kino sənətinə maraq göstərmələri və bu irsin qorunmasında fəal iştirak etmələri tövsiyə olundu.
Çıxışdan sonra Mədəniyyət Nazirliyinin sifarişi ilə istehsal olunmuş “Cənnət yuxusu” bədii-sənədli filmi nümayiş olundu. Kino mühitində maraqlı müzakirələrə səbəb olan bu ekran işi gənclərin marağına səbəb oldu.
