Müasir dövrdə texnologiyanın inkişafı uşaqların və yeniyetmələrin gündəlik həyatını köklü şəkildə dəyişib. Onlar artıq məktəbdə, evdə və dostları ilə ünsiyyətdə olduğu qədər virtual aləmdə də aktivdirlər. Lakin sosial şəbəkələrdə görünməyən, lakin bir o qədər də real olan bir təhlükə var: online zorakılıq - təhqir, şantaj, alçaltma və emosional manipulyasiya.
Uşaqlar və yeniyetmələr sosial mediada tez-tez özlərini ifadə etməyə, fikir bildirməyə və ünsiyyət qurmağa çalışırlar. Lakin bu platformalarda tez-tez onlara qarşı kobud rəftar, şəxsi məlumatların ifşası, bədənləri və görünüşləri ilə bağlı alçaldıcı rəylər, habelə şəxsi fotolar və ya yazılarla şantaj halları baş verir. Bu, onların psixoloji rifahına ciddi zərbə vurur.
Tehsil365 xəbər verir ki, psixoloqlar bu məsələ ilə bağlı bildirir ki, online zorakılığın psixoloji nəticələri real həyatdakından heç də geri qalmır, bəzən daha dərin izlər buraxa bilər:
“Onlayn təhqirə və zorakılığa məruz qalan uşaqlar özlərinə inamı itirir, sosiallaşmaqdan çəkinir, tənha qalmağa üstünlük verirlər. Bu, zamanla depressiya, panik atak və hətta intihar düşüncələrinə qədər gətirib çıxara bilər. Xüsusilə yeniyetmələr üçün bu cür hallar özünüdərk prosesini və şəxsiyyət formalaşmasını pozur.”
Online zorakılıq hallarının çoxu valideyn və müəllimlərin nəzərindən yayındığı üçün uşaqlar çox zaman bu barədə susur. Onlar utanır, qorxur və ya heç kimə güvənmədikləri üçün yaşadıqları zorakılığı gizlədirlər. Bu isə vəziyyəti daha da ağırlaşdırır.
Ekspertlər bu sahədə profilaktik tədbirlərin gücləndirilməsinin vacibliyini vurğulayır. Ailə daxilində açıq və təhlükəsiz ünsiyyət mühiti yaradılmalı, uşaqlara rəqəmsal savadlılıq və şəxsi sərhədlər haqqında təlimlər keçirilməlidir. Məktəblərdə isə internetdə təhlükəsizlik mövzuları dərs proqramlarına daxil edilməli, psixoloji dəstək xidməti gücləndirilməlidir.
Online zorakılıq görünməz düşməndir. Kaviatura arxasında gizlənsə də, təsiri real və dağıdıcıdır. Bu səbəbdən cəmiyyətin bütün təbəqələrinin valideynlərin, müəllimlərin, psixoloqların və media qurumlarının birgə hərəkət etməsi, bu təhlükəyə qarşı mübarizədə həmrəy olması həyati əhəmiyyət daşıyır.