Məşhur YouTuber və xeyriyyəçi MrBeast (əsl adı Jimmy Donaldson) növbəti humanitar təşəbbüsü ilə gündəmə gəlib. O, Afrikanın su qıtlığı yaşanan bölgələrində bir neçə su quyusu inşa etdirərək minlərlə insanın təmiz suya çıxışını təmin edib.
"Tehsil365" xəbər verir ki, MrBeast-in yayımladığı videoda Tanzaniya, Keniya, Zimbabve, Uqanda və digər ölkələrdə yerləşən kəndlərdə su quyularının tikintisi, yerli əhalinin sevinci və təşəkkürü əks olunur. Layihə çərçivəsində həmçinin yeni su sistemləri, əl yuyucu stansiyalar və ictimai çeşmələr də qurulub.
MrBeast qeyd edib ki, bu təşəbbüs sayəsində artıq minlərlə insan təmiz içməli suya daha asan çıxış əldə edir. Onun sözlərinə görə, bu layihə təkcə su təminatı deyil, həm də sağlamlıq, təhsil və ümumi həyat keyfiyyəti baxımından ciddi dönüş nöqtəsidir.
YouTuber əlavə edib ki, videonun gəlirlərinin bir hissəsi növbəti quyuların inşasına yönləndiriləcək. O, izləyicilərini də kampaniyaya qoşulmağa və daha çox insana kömək etməyə çağırıb.
Qeyd edək ki, MrBeast indiyə qədər müxtəlif sosial problemlərə diqqət çəkən və milyonlarla insanın həyatına təsir edən layihələr həyata keçirib. Onun bu son təşəbbüsü isə Afrikada dayanıqlı inkişaf məqsədlərinə töhfə verən mühüm addımlardan biri hesab olunur.