Delhi Məktəb Təhsili Qanun Layihəsi 2025, musson sessiyası ilə birlikdə Delhi Məclisinə təqdim olunacaq. Qanun layihəsinin əsas məqsədi, xüsusi məktəblərin ödəniş siyasətinə sərt nəzarət və bu sahədəki özbaşınalıqlara qarşı təsirli cəza mexanizmləri tətbiq etməkdir.
"Tehsil365" NBT Times-in yaydığı məlumata görə bildirir ki, son illərdə məktəb haqlarının davamlı şəkildə artırılmasından narazı qalan valideynlərin şikayətlərinə cavab olaraq Delhi hökuməti, bu təşəbbüsü ilə minlərlə ailəyə rahatlıq gətirməyi hədəfləyir. Layihəyə əsasən, xüsusi məktəblərin şagirdlərin qeydiyyatını ləğv etməsi, imtahan nəticələrini gecikdirməsi, dərs və ya fəaliyyətlərdən kənarlaşdırması və ya psixoloji təzyiq göstərməsi kimi hallar ciddi qanun pozuntusu sayılacaq. Belə hallarda Təhsil Direktoru, şagird başına 50 min rupiyəyə qədər cərimə tətbiq edə biləcək.
Yeni qanun layihəsi həmçinin məktəb daxilində Valideynlərin də təmsil olunacağı Ödəniş Tənzimləmə Komitələrinin yaradılmasını nəzərdə tutur. Bu komitələr məktəb haqlarının artırılıb-artırılmayacağına qərar verəcək və bu qərarlara etiraz etmək istəyənlər üçün əvvəlcə Rayon Komitəsi, daha sonra isə Dövlət Apellyasiya Komitəsi nəzərdə tutulub.
Delhi hökumətinin bu addımı, hər il təhsil haqqının artmasından əziyyət çəkən yüz minlərlə ailənin yükünü azaltmaq və xüsusi məktəblərin şəffaflıq və hesabatlılığını təmin etmək baxımından mühüm bir təşəbbüs kimi qiymətləndirilir. Layihə qəbul olunduğu və düzgün tətbiq edildiyi təqdirdə, bölgədə təhsilin kommersiyalaşması prosesinə müəyyən nəzarət mexanizmi gətirilə bilər.