Azərbaycanın kənd təsərrüfatına əsaslanan bölgələrində aqronomlara olan tələbat hər keçən il daha da artır.
“Təhsil365” araşdırmasına görə, məhz bu səbəbdəndir ki, son illərdə "Aqronomluq" ixtisası bir çox region universitetlərində – xüsusilə Gəncə Dövlət Universiteti, Azərbaycan Texnologiya Universiteti və UNEC-in Zaqatala və Quba filiallarında tədris olunur.
Aqronom kimdir?
Aqronom - bitkiçilik sahəsində yüksək bilik və bacarıqlara malik mütəxəssisdir. Onlar əkin sahələrinin planlaşdırılması, bitkilərin sağlam inkişafı, gübrələmə, suvarma və ziyanvericilərlə mübarizə proseslərini elmi əsaslarla təşkil edir. Aqronomlar həm də məhsuldarlığın artırılması və torpağın qorunması istiqamətində mühüm rol oynayır.
Aqronomluq ixtisası üzrə təhsil alan tələbələr: Bitki fiziologiyası, torpaqşünaslıq, aqrokimya, entomologiya və genetika kimi fundamental fənlərdən dərs alırlar. Müasir kənd təsərrüfatı texnologiyalarına yiyələnirlər. Yerli və beynəlxalq aqrar layihələrdə təcrübə imkanlarına sahib olurlar. Təhsil müddəti adətən 4 il təşkil edir (bakalavr səviyyəsi).
Bəs sual yaranır gənclər bu ixtisası oxuduqdan sonra harada çalışa bilərlər?
Bu ixtisas üzrə məzunlar- Kənd Təsərrüfatı Nazirliyi və ona bağlı qurumlarda, fermer təsərrüfatlarında, aqroservis mərkəzlərində, bitkiçilik və toxumçuluq müəssisələrində, elmi-tədqiqat institutlarında fəaliyyət göstərə bilərlər.
Niyə bu ixtisas sadəcə region universitetlərində var?
Aqronomluq kimi praktik və sahəyə bağlı ixtisasların regionlarda tədris olunması bir sıra üstünlüklər yaradır:
Tələbələr əkin sahələrində real praktika keçə bilirlər. Yerli fermer təsərrüfatları ilə birbaşa əlaqə qururlar. Regional əmək bazarına uyğun ixtisaslaşma imkanı əldə edirlər.
Nəticə olaraq, aqronomluq ixtisası yalnız təbiətlə işləməyi deyil, həm də kənd təsərrüfatının gələcəyini formalaşdırmağı hədəfləyənlər üçün ideal seçimdir. Xüsusilə bölgələrdə yaşayan və torpaqla bağlı gələcək planları olan gənclər üçün bu ixtisas həm iş imkanı, həm də vətənə xidmət yoludur.