Bakı Dövlət Universitetində (BDU) 2025/2026-cı tədris ili üçün 75 ixtisas üzrə tələbə qəbulu aparılacaq. Universitet bu il də abituriyentlərə geniş və müasir təhsil imkanları təqdim edir.
Bu barədə BDU-dan “Tehsil365”ə bildirilibki,hazırda BDU-da 25 mindən çox tələbə təhsil alır. Universitetin tərkibinə 16 fakültə, 119 kafedra, SABAH Mərkəzi, 2 elmi-tədqiqat institutu, Tədqiqat, İnkişaf və İnnovasiyalar üzrə Mükəmməllik Mərkəzi, 5 elmi-tədqiqat mərkəzi və 22 elmi-tədqiqat laboratoriyası daxildir. Bundan əlavə, 24 tədris laboratoriyası, 2 milyondan çox kitab fondu olan Elmi Kitabxana, 5 muzey, 4 beynəlxalq institut və mərkəz, 1 tədris-təcrübə və istirahət mərkəzi fəaliyyət göstərir.
BDU-nun həmçinin Qazax filialı, İqtisadiyyat və Humanitar Kolleci, “Gənc istedadlar” liseyi və digər elm-təhsil müəssisələri ilə əməkdaşlıq əlaqələri var.
Universitetdən verilən məlumata görə, bu infrastruktur və akademik potensial BDU-nun təhsil sisteminin genişləndirilməsində və inkişafında mühüm rol oynayır.