Son günlər cəmiyyətdə böyük rezonans doğuran uşaq hadisələri ilə bağlı media və sosial şəbəkələrdə azyaşlıların adı, fotosu və şəxsi məlumatlarının geniş şəkildə paylaşılması ciddi narahatlıq yaradıb.
Bu məsələ ilə bağlı açıqlama verən Ailə, Qadın və Uşaq Problemləri üzrə Dövlət Komitəsinin mətbuat katibi Teymur Mərdanoğlu “Tehsil365”ə vurğulayıb ki, uşağın hüquqları, məxfiliyi və psixoloji sağlamlığı hər zaman ön planda olmalıdır:
“Bu kimi həssas hallarda uşağın adı, şəkli və digər şəxsi məlumatların açıqlanması düzgün deyil. Belə detalların ictimaiyyətə çatdırılması uşağın gələcəyinə mənfi təsirlər göstərə bilər. Həm ailə, həm də media nümayəndələri bu prinsiplərə ciddi şəkildə əməl etməlidir. Uşaqların hüquqlarını qoruyan qanunlar və beynəlxalq sənədlər — o cümlədən Uşaq Hüquqları haqqında Konvensiya — belə məlumatların yayılmasını məhdudlaşdırır.”
Teymur Mərdanoğlu həmçinin qeyd edib ki, itmə və digər həssas hadisələrdə dərhal hüquq-mühafizə orqanlarına məlumat verilməli və axtarış işləri başlanmalıdır.
“Uşaqların gələcək həyatına zərər vurmamaq üçün ictimaiyyətin və medianın məsuliyyətli davranması vacibdir. Bu, hər birimizin borcudur,” — deyə o əlavə edib.
Məsələ ilə bağlı Ailə, Qadın və Uşaq Problemləri üzrə Dövlət Komitəsi və Daxili İşlər Nazirliyi də uşaqların hüquqlarının qorunması və məxfiliyinin təmin olunması istiqamətində maarifləndirmə işlərini davam etdirirlər.