Mersin 75. Yıl Fen Lisesi şagirdləri boğulma hadisələrinin qarşısını almaq üçün "avtonom xilasetmə simidi" hazırlayıblar.
9-cu sinif şagirdləri Kuzey Üçkan, Buğlem Yalçın və Ümmühan Aden Yıldırım yay aylarında artan boğulma hadisələrinə qarşı mübarizəyə töhfə vermək məqsədilə süni intellektlə təchiz olunmuş xilasetmə simidi yaratmağa qərar veriblər.
"Tehsil365" Türkiye Milli Eğitim Bakanlığının verdiği məlumata görə bildirir ki, riyaziyyat müəllimi Alperen Çağrı Gülerin rəhbərliyi altında məktəbin Süni İntellekt Sinfində 8 ay ərzində işləyərək hazırladıqları cihazı "LIFESEAVER" adlandırıblar.
Bu layihə ilə onlar 1-4 may tarixlərində Şimali Kipr Türk Cümhuriyyətində keçirilən TEKNOFEST-də Sosial İnnovasiya Müsabiqəsində "Ticariləşdirmə Potensialı Mükafatı" və Ən Yaxşı Səhnə Təqdimatı üzrə ikinci yerə layiq görülüblər.
Dənizdə səs, görüntü və bədən istiliyi kimi məlumatları müəyyən tezlikdə izləyən cihaz, boğulma təhlükəsi ilə üzləşən şəxsi aşkar etdikdə avtomatik olaraq həmin əraziyə hərəkət edir.
Eyni anda xilasetmə qruplarına məlumat ötürən simid, çətin vəziyyətdə olan şəxsi tutaraq sahilə çıxmasına kömək edir.
Şagirdlər cihazı ticariləşdirərək kütləvi istehsala hazırlamağı hədəfləyirlər.