ADA Universitetində 2025/2026-cı tədris ili üçün ilk dəfə olaraq dövlət sifarişi ilə təhsil almaq imkanı yaradılıb. Universitet bu ildən etibarən müxtəlif ixtisaslar üzrə ümumilikdə 180 plan yerini dövlət sifarişi (pulsuz təhsil) əsasında təqdim edir.
Tehsil365 xəbər verir ki, universitetə dövlət sifarişi əsasında qəbul edilən tələbələr təhsil müddəti boyunca təhsil haqqından tam azad olunacaq və akademik göstəricilərinə uyğun olaraq aylıq təqaüdlə təmin ediləcəklər.
İxtisaslar üzrə plan yerləri aşağıdakı kimi müəyyən edilib. I ixtisas qrupu üzrə Kompüter elmləri, Kompüter mühəndisliyi, İnformasiya texnologiyaları və Riyaziyyat sahələrinə hər biri üzrə 30 yer ayrılıb. Bu isə ümumilikdə 120 yer deməkdir. II ixtisas qrupu üzrə isə Maliyyə və İqtisadiyyat ixtisasları üzrə hər birinə 30 yer olmaqla 60 plan yeri təqdim olunub.
Qeyd edək ki, ötən il – 2024/2025-ci tədris ili üzrə ADA Universitetində dövlət sifarişi ilə təhsil üçün heç bir plan yeri ayrılmamışdı. Bu isə sözügedən qərarın ali təhsilin əlçatanlığının artırılması istiqamətində atılmış mühüm addım olduğunu göstərir.
Hazırda ADA Universitetinə qəbul prosesi davam edir və abituriyentlər müvafiq ixtisas seçimlərini edərkən dövlət sifarişli yerlərdən yararlanmaq imkanına malikdirlər.