Təhsil eksperti Məzahir Məmmədli abituriyentlərin ixtisas seçimi ilə bağlı mövcud vəziyyəti tənqid edib. Onun sözlərinə görə, bu prosesdə əsas qərarverici şəxs abituriyentin özü olmalıdır.
"Bu seçimi abituriyentlərin özünün ixtiyarına buraxmaq lazımdır. Valideynlərin təzyiqi ilə yox, gənclərin maraq və arzularına uyğun ixtisas seçiminə şərait yaradılmalıdır", – deyə o bildirib.
Ekspert qeyd edib ki, bir çox hallarda valideynlər övladlarının hansı ixtisasa yiyələnməsini özləri müəyyənləşdirir və bu, gənclərin seçim hüququnun pozulması ilə nəticələnir.
Məzahir Məmmədli həmçinin Dövlət İmtahan Mərkəzinin ixtisas yox, qrup əsaslı imtahan sistemini də tənqid edib:
"Bu, abituriyentin azad seçim haqqını məhdudlaşdırır. Dünyanın heç bir yerində bu cür sistem yoxdur. Gərək gənc hansı peşəni seçmək istəyirsə, birbaşa həmin sahəyə yönələ bilsin."
Ekspert sonda bu məsələdə islahatlara ehtiyac olduğunu vurğulayıb:
"Abituriyentlər qruplar üzrə deyil, ixtisaslar üzrə yönləndirilməlidir. Bu, onların hüquqlarına zidd olan haldır və dəyişdirilməlidir."