Təhsil İnkişafı Fondu, Birbank və Visa şirkətləri ilə birgə həyata keçirdiyi “TələbəPlus” layihəsi çərçivəsində tələbələrə bir sıra güzəştlər və sosial imkanlar təqdim edir. Layihənin məqsədi ölkə üzrə bütün ali təhsil müəssisələrinin tələbələrinin eyni güzəşt və endirimlərdən yararlanmasını təmin etməklə yanaşı, onların sosial həyatlarına dəstək göstərməkdir.
Fonddan Tehsil365-ə bildirilib ki, “TələbəPlus” kartı tələbələrə giriş-çıxış, təqaüd, debet kartı kimi xidmətləri bir arada təqdim edir. Kart vasitəsilə nağdsız ödəniş, bol-bol güzəşt və xüsusi endirimlərdən istifadə etmək mümkündür. Hazırda layihəyə 24 universitet və 190 minə yaxın tələbə qoşulub. Tələbələrə təqdim olunan endirimlər 75 faizədək dəyişir və 20-dək müxtəlif kateqoriyanı əhatə edir.
Layihə çərçivəsində 350-dən çox tərəfdaş qurumla əməkdaşlıq edilir. Bu tərəfdaşlar arasında McDonald’s, Park Cinema, Koton, LC Waikiki, Penti, Wolt, Handex, Referans Medical Group, Baku Design Academy, iSchool, Yango, ARI, Fibonacci, Codenland və digər məşhur brend və təşkilatlar yer alır.
Tələbələr kartla həm sosial, həm də gündəlik tələbatlarını daha sərfəli şəkildə qarşılaya biləcəklər. Əlavə məlumat üçün tif.edu.az saytına daxil olmaq tövsiyə olunur.