İqtisadiyyat Nazirliyi və Elm və Təhsil Nazirliyinin birgə təşəbbüsü ilə həyata keçirilən “4Sİ Akademiyası” çərçivəsində “Milli Proqram”ın 4-cü mərhələsinə start verilib. Bu mərhələdə daha 7500 vətəndaş 6 həftə ərzində “Coursera” platformasında ödənişsiz təlimlərdən yararlanacaq.
Təhsilin İnkişafı Fondun-dan “Tehsil365”ə bildirilib ki, apreldən bəri 22 500 nəfər proqramdan faydalanıb, 120 minə yaxın təlimə qoşulub və 41 mindən çox beynəlxalq sertifikat əldə olunub. Ən çox seçilən sahələr süni intellekt, data elmi, layihə idarəçiliyi, kibertəhlükəsizlik və biznes olub.
Hazırda 15 məşhur təlim Azərbaycan dilində təqdim olunur. Yerli qurumlar artıq öz təlimlərini “Course Builder” vasitəsilə platformaya inteqrasiya edir. Proqramın məqsədi rəqəmsal transformasiyanı sürətləndirmək və əmək bazarı üçün rəqabətqabiliyyətli kadrlar hazırlamaqdır.
İstənilən Azərbaycan vətəndaşı yaşından və statusundan asılı olmayaraq form.4sim.gov.az üzərindən qeydiyyatdan keçərək bu imkandan faydalana bilər. Layihə SOCAR, Pasha Holding, bp, JOCAP və Azerconnect Group kimi şirkətlərin dəstəyi ilə həyata keçirilir.