ABŞ Daxili Təhlükəsizlik Nazirliyi (DHS), Harvard Universitetinin beynəlxalq tələbələrə ev sahibliyi etmək üçün zəruri olan Tələbə Mübadilə və Ziyarətçi Proqramı (SEVP) sertifikatını ləğv etməyəcəyini açıqlayıb. Bu qərar, Tramp administrasiyasının may ayında göndərdiyi və Harvardın sertifikatının “qanunlara əməl etmədiyi” iddiası ilə iptal ediləcəyini bildirən məktubunun ardından gəlib.
"Tehsil365" xarici xəbər saytına istinadən bildirir ki, Harvard həmin vaxt məsələni məhkəməyə çıxararaq, qərarın Konstitusiyanın Birinci Düzəlişini və ədalətli məhkəmə hüququnu pozduğunu bildirmişdi. Universitet, federal hökumətin bu addımını “ideoloji təzyiq və tədris müstəqilliyinə müdaxilə” kimi qiymətləndirib.
Mütəxəssislərə görə, sertifikatın itirilməsi Harvardın beynəlxalq tələbə sayını kəskin azaldaraq, ciddi maliyyə zərərinə səbəb ola bilərdi.
Bununla yanaşı, ABŞ Dövlət Departamenti Harvardın J-1 viza proqramındakı iştirakını da araşdırmağa başlayıb. Bu proqram xarici tədqiqatçılar, alimlər və doktorantlara ölkədə işləmək imkanı verir.
Tramp administrasiyası son aylarda Columbia və Brown universitetləri ilə antisemitizm ittihamları və digər şərtlər əsasında razılaşmalar əldə edib. Harvard isə hələlik hökumətin tələblərini böyük ölçüdə rədd edir.