“Təhsil365”ə müsahibəsində təhsil eksperti Rizvan Fikrətoğlu ona ünvanlanan “Azərbaycanda formal və qeyri-formal təhsilin inteqrasiyası və inkişafı üçün hansı addımlar atılmalıdır?” sualı ətrafında öz tövsiyələrini bölüşdü:
Formal təhsil məktəblərdə və universitetlərdə keçirilən ənənəvi təhsil sistemidir. Qeyri-formal təhsil isə kurslar, təlimlər, könüllülük layihələri və digər qeyri-ənənəvi təhsil fəaliyyətlərini əhatə edir. Təhsil sistemində formal və qeyri-formal təhsilin inteqrasiyası həm təhsilin keyfiyyətini, həm də gənclərin bacarıq səviyyəsini artırır.
Məsələn, universitet proqramlarında qeyri-formal təhsil kreditlərinin (könüllülük fəaliyyəti, beynəlxalq sertifikatlar və s.) akademik bal kimi tanınması təhsil sisteminə elastiklik gətirə bilər. Məktəblərdə isə layihə əsaslı öyrənmə modullarının dərs proqramına daxil edilməsi praktiki bacarıqların inkişafını təmin edir.
Ekspert bildirir ki, Dövlət və özəl sektor arasında əməkdaşlıq yaradılmalı, şirkətlər gənclər üçün təcrübə proqramları təşkil etməkdə stimullaşdırılmalıdır. Bu məqsədlə vergi güzəştləri və dövlət dəstəyi kimi təşviq mexanizmləri tətbiq edilməlidir. Xüsusilə İT və kənd təsərrüfatı kimi sahələrdə praktiki təhsil mərkəzlərinin açılması faydalı olar.
Rəqəmsal təhsil platformalarının inkişafı da vacibdir. Azərbaycan dilində açıq onlayn kursların hazırlanması, elektron təhsil portalında formal və qeyri-formal kursların vahid qeydiyyat və nəzarət sisteminin yaradılması təhsilin əlçatanlığını artırar.
Fikrətoğlu əlavə edir ki, qeyri-formal təhsilin tanınması, iştirak sertifikatlarının rəsmi akkreditasiyası və peşə standartlarına uyğun kompetensiya qiymətləndirmə sistemlərinin yaradılması da önəmlidir.
Eyni zamanda, mədəniyyət dəyişməli, valideynlər və müəllimlər arasında ömür boyu öyrənmə anlayışı formalaşmalıdır. Uşaqlara yalnız imtahan nəticələrinə görə deyil, yaradıcılıq və təşəbbüskarlığa görə də dəyər verilməlidir.
Ekspert sonda qeyd edir ki, bu addımlar atılanda, formal təhsil yalnız diplom verən sistem olmaqdan çıxaraq, qeyri-formal təhsil ilə birlikdə bacarıq mərkəzli daha çevik və müasir bir modelə çevriləcək.