Bu gün "Tehsil365" komandası olaraq "Şəhidin Səsi" verilişinin növbəti buraxılışını lentə aldıq. Verilişdə şəhid İlkin Babayevin anası kənddəki yolların bərbad vəziyyəti ilə bağlı narahatlığını ifadə etdi:
“Dəfələrlə icra orqanına müraciət etmişik, lakin baxan yoxdur. Dövlət büdcəsindən vəsait ayrılmışdı, 44 günlük müharibədən sonra yenidən müraciət etdim, amma dedilər ki, büdcədə pul qalmayıb. Çəkilişlərə gəliblər, neçə dəfə deyiblər ki, bunu edəcəyik, amma heç nə olunmayıb. Məhəllənin adı belə yoxdur, yollar bərbad vəziyyətdədir. Təcili yardım gələ bilmir, uşaqlar məktəbə gedəndə əziyyət çəkirlər...”
Şəhidin qonşusu da öz narazılıqlarını dilə gətirib.
Bu məsələ ilə bağlı Sabunçu Rayon İcra Hakimiyyətinə müraciət etdik. İcra hakimiyyətindən "Tehsil365"ə verilən rəsmi açıqlama isə belə oldu:
“Rayonun bütün qəsəbələrində olduğu kimi, Maştağa qəsəbəsində də qəsəbədaxili yolların asfaltlanması mərkəzləşmiş qaydada aidiyyəti üzrə Azərbaycan Avtomobil Yolları Dövlət Agentliyi tərəfindən Dövlət İnvestisiya Proqramları çərçivəsində həyata keçirilir. Maştağa qəsəbəsində İsmayıl Dağıstanlı küçəsində də yolun asfaltlanması ilə bağlı tədbirlərin İnvestisiya Proqramına salınması üçün Rayon İcra Hakimiyyəti tərəfindən aidiyyəti üzrə müraciət olunmuşdur.”
Rəsmi qurumdan verilən məlumata görə, bu məsələ ilə bağlı səlahiyyət Azərbaycan Avtomobil Yolları Dövlət Agentliyinin üzərinə düşür. Bildirilir ki, məsələ ilə əlaqədar aidiyyəti üzrə müraciət olunub.