Fransanın Bezanson şəhərində Dünya Fransız dili Müəllimlərinin XVI Qurultayı keçirilib. Dörd ildən bir dünyanın müxtəlif qitəsində/ölkəsində keçirilən qurultaya bu dəfə Fransanın Bezanson şəhəri ev sahibliyi edib (XVII qurultay 2029-cu ildə Hindistanda nəzərdə tutulur).
Bu haqda ADU’dan “Tehsil365”ə bildirilib ki, qurultayda ölkəmizi Azərbaycan Dillər Universitetinin Filologiya fakültəsi nəzdində Xarici dillərin tədrisi metodikası kafedrasının dosenti, pedaqogika üzrə fəlsəfə doktoru Gülbəniz Camalova, Fransız dilinin fonetikası və qrammatikası kafedrasının müəllimi Aynur Cəbiyeva, və İngilis və fransız dili fakültəsi nəzdində Fransız dilinin leksikologiyası və üslubiyyatı kafedrasının dosenti, filologiya üzrə fəlsəfə doktoru Aygün Məqami və baş müəllim Xatirə Qarazadə təmsil ediblər.
Qurultayda Gülbəniz Camalova “Hər bir fransız dili dərsi dil və linqvistik müxtəlifliyi əks etdirən mədəniyyətlərin kəsişməsidir” (“Chaque cours du français est un carrefour de cultures montrant les diversités langagières et linguistiques ») mövzusunda çıxış edib, iştirakçı müəllimlər panel müzakirələrinə, sərgilərə, atöliyelərə qoşulmuş, qurultayın işində fəallıq göstərmiş və sertifikatlar alıblar.
9-21 iyul 2025-ci il tarixlərində Fransada olan müəllimlər, qurultayda iştirak etdikdən sonra 3 gün Paris şəhərində olub, Azərbaycanın Fransadakı Səfirliyinin 18 iyul saat 16.00 - da təşkil etdiyi Eyfel qülləsinin yanında yerləşən Azərbaycan Mədəniyyət evində rəsmi görüşdə olublar.
Nümayəndə heyətini Azərbaycanın Fransadakı Səfirliyinin Mədəniyyət işləri üzrə Attaşesi Nigar xanım Hüseynova qəbul edib.
Fransanın Azərbaycandakı sabiq səfiri Jean Pier Ginüt, keçmiş müşavir Gi Şovalier görüşdə iştirak edib, Azərbaycanda işlədikləri dövrlə bağlı maraqlı, unudulmaz xatirələrini nümayəndə heyəti ilə bölüşüblər.
Nümayəndə heyətinin Bakıdan apardığı hədiyyələr həmçinin, Azərbaycan Dillər Universitetinin rektoru, akademik Kamal Abdulla və universitetin professoru, Fransız dilinin Leksikologiyası və üslubiyyatı kafedrasının müdiri Gülnarə Sadıxovanın rəhbərliyi ilə universitetin müəllimlər qrupu tərəfindən hazırlanmış "Découvrons l'Azerbaidjan" adlı dərs vəsaiti qonaqlara təqdim olunub.
Ümumilikdə bu kitabdan (11 ədəd) qurultayda iştirak edən, müxtəlif qitələrdən gələn, nümayəndə heyətinə, tanınmış rəhbər və pedaqoqlara hədiyyə olunub.
Səfər ərzində təşkil olunmuş bu maraqlı görüşə görə Parisdəki Azərbaycan səfirliyinə, xüsusilə Səfir Leyla Abdullayevaya, Mədəniyyət Attaşesi Nigar Hüseynovaya minnətdarlıq bildirilib.