Psixoloq Mirzəyeva “Tehsil365”ə müsahibəsində erkən nikahın gənclərdə depressiya, gələcək qorxusu və sosial təcrid yaratdığından danışıb.Onun sözlərinə görə, bu vəziyyət gənclərdə stress, gələcək qorxusu, özünə inamsızlıq, depressiya və dostlardan uzaqlaşma kimi ciddi fəsadlara yol açır.
Nabat xanım bildirib ki, təhsildən yayınan gənclər böyük stress yaşayır və bu stressin əsas mənbəyi gələcək qayğısıdır:
"Bu stress nəticəsində depressiya, təşviş, panikataka, diqqət çatışmazlığı, ailədaxili konfliktlər və sosial təcrid yaranır. İnsan artıq mühitə çıxmaq istəmir, özünə qapanır və psixoloji gərginlik artır."
Psixoloqun sözlərinə görə, erkən nikah gənclərin üzərinə vaxtından əvvəl maddi və mənəvi məsuliyyət qoyur ki, bu da onların sosial mühitdən uzaqlaşmasına səbəb olur:
"İnsan hələ uşaqkən böyüklərin yükünü daşımağa başlayır. Bu, dostlardan uzaqlaşma, sosial təcrid və ailədaxili gərginlik yaradır. Valideynlər isə yetkinləşməmiş övladlarından böyüklər kimi davranmağı gözləyirlər."
Erkən nikahdan qorunma yollarına toxunan mütəxəssis qeyd edib ki, gənclərin özünü tanıması və qərarvermə bacarıqlarını inkişaf etdirməsi vacibdir:
"Gənclərə ‘yox’ demək bacarığı, stresslə mübarizə və düzgün qərarvermə yolları öyrədilməlidir. Maarifləndirmə tədbirlərində real həyat nümunələri və faktlar təqdim olunmalıdır."
Nabat xanım vurğulayıb ki, erkən nikah gəncin gələcək planlarını da ciddi şəkildə məhdudlaşdırır:
"Gənc artıq özünü bütün məsuliyyətləri daşıyan biri kimi görür, gələcək arzularından uzaqlaşır, həyata inamı azalır. Belə insanlara yaşadıqları hadisələri stimul kimi görməyi, kiçik də olsa hədəflərə doğru addım atmağı öyrətmək lazımdır."
Psixoloq əlavə edib ki, erkən nikahın uzunmüddətli təsirləri arasında dəyərsizlik hissi, diqqət dağınıqlığı, sosial təcrid və insanlara qarşı qəzəb də var:
"Ailələr və cəmiyyət bu gənclərə psixoloji dəstək verməli, xüsusilə kənd və rayon yerlərində maarifləndirmə aparmalıdır. Əgər erkən nikah artıq baş veribsə, həmin şəxslərin həyatını yenidən qurması üçün sosial və emosional dəstək mexanizmləri yaradılmalıdır”—deyə o vurğulayıb.