Təlim kurslarına maraq getdikcə artır, lakin iştirakçılar kursların hüquqi məsuliyyətlərini və verdiyi vədlərin etibarlılığını da bilməlidirlər. Xüsusilə iş vəd edən kurslar və sertifikatların beynəlxalq tanınması məsələləri oxucular üçün əhəmiyyətlidir. Hüquqşünas Əkrəm Həsənov bu mövzuda “Tehsil365”ə müsahibəsində əsas məqamları vurğulayıb
Təlim kursları tərəfindən verilən iş vədləri hüquqi məsuliyyət daşıyırmı?
“Bu, əsasən müqavilə şərtlərindən asılıdır. Əgər kursu təşkil edən şəxs müqavilədə konkret öhdəlik götürürsə, məsələn, “kursu bitirəndən sonra işə düzəldəcəyəm”, o zaman bu hüquqi məsuliyyət daşıyır və öhdəliyi yerinə yetirməlidir. Amma əgər müqavilədə yazılıb ki, “səy göstərəcəyik, çalışacağıq” və ya yalnız sözlə vəd verilibsə, bu artıq hüquqi öhdəlik sayılmır. Yəni, hər şey yazılı müqavilədən asılıdır”.
Əgər öhdəlik yerinə yetirilməsə, kurs iştirakçısı ödədiyi ödənişi geri tələb edə bilərmi?
“Bəli, əgər müqavilədə konkret öhdəlik göstərilibsə və yerinə yetirilməyibsə, iştirakçı ödədiyi pulu geri tələb edə bilər. Yenə qeyd etmək lazımdır ki, bu yalnız yazılı müqavilə şərtlərinə əsaslanır”.
Dövlət tərəfindən təlim kurslarına nəzarət necə həyata keçirilir?
“Dövlət buna heç bir nəzarət etmir, çünki bu rəsmi təhsil deyil – orta və ya ali məktəb təhsili deyil. Dövlət yalnız vergi ödənişlərinə nəzarət edir. Bundan başqa, rəsmi nəzarət yoxdur və olmasına da ehtiyac yoxdur”.
Kurslar tərəfindən təqdim olunan sertifikatların beynəlxalq tanınması ilə bağlı hansı hüquqi məsələlər mövcuddur?
“Bu sertifikatlar dövlət standartlarına uyğun deyil və beynəlxalq hüquqdan doğan rəsmi tanınması yoxdur. Bəzi qeyri-dövlət beynəlxalq təşkilatları bu sertifikatları tanıya bilər, amma bunlar dövlət tərəfindən qəbul olunmuş standartlar deyil”.