Klinik psixoloq Gülşən Rüstəmova “Tehsil365”ə müsahibəsində qeyd edir ki, gənclərin erkən nikaha yönəlməsində təkcə yaş faktoru həlledici deyil. Onun sözlərinə görə, ailə mühiti, sosial təsirlər, genetik faktorlar və şəxsi istəklər bu qərarda mühüm rol oynayır.
“Gənc erkən nikaha üz tutursa, bu, adətən onun öz istəyi və seçimidir, burada məcburiyyət rolu yoxdur”, – deyə psixoloq vurğulayır.
Rüstəmova bildirir ki, erkən nikahın emosional nəticələri gəncin gözləntiləri ilə sıx bağlıdır:
“Hər bir gənc nikahdan sonra müəyyən məyusluq yaşaya bilər, amma bu peşmanlıq universal deyil. Əsas məsələ gözləntilərlə reallığın uyğunluğudur. Əgər gözləntilər qarşılanmırsa, stress və psixoloji gərginlik qaçılmaz olur.”
Psixoloq sağlam qərar verməyin əsas şərtini həm psixoloji, həm də fizioloji hazırlıqda görür. O, məktəblərdə və ailələrdə nikahın məsuliyyətləri barədə düzgün maarifləndirmənin vacibliyini qeyd edir:
“Biz övladlarımıza nümunə göstərməliyik. Danışdıqlarımız və münasibətimiz onların seçimlərinə birbaşa təsir edir. Sağlam psixoloji immunitet isə sağlam qərarların təməlidir.”
Rüstəmova nikahı sadəcə iki fərdin birliyi kimi deyil, sosial və fərdi faktorların qarşılıqlı təsiri kimi dəyərləndirir:
“Nikah mürəkkəb prosesdir: həyatın dəyişməsi, yeni münasibətlər, köhnə vərdişlərin qorunması və yeniliklərin qəbulu. Cəmiyyətin basqısı və yanlış təsirlər gəncləri psixoloji gərginliyə sürükləyə bilər. Buna görə ailə və cəmiyyət düzgün nümunə göstərməlidir.”
Sonda psixoloq vurğulayır ki, gənclərin erkən nikahdan qorunması üçün həm fərdi psixoloji hazırlıq, həm də sosial dəstək lazımdır:
“Psixoloji immunitet üzərində işləməli, gözləntilərimizi real formalaşdırmalıyıq ki, gənclər məyusluq və stress yaşamadan sağlam seçimlər edə bilsinlər.”