Psixoloq Fəridə Musəvi təhsildə qarşılaşılan gender stereotipləri və onların gələcək karyera imkanlarına təsiri barədə “Tehsil365”ə müsahibəsində danışıb. Musəvi bildirib ki, bəzi valideynlərin şüuraltında kodlanmış düşüncə var ki, “qadın diplomu başının altına qoysun, ər evinə cehiz aparsın, işlətməsələr də olar”. Bu yanaşma övladın karyera imkanlarını məhdudlaşdıra bilər.
Psixoloq qeyd edir ki, belə düşüncə ilə böyüyən qadınlar çox zaman təhsilini tam istifadə edə bilmir, ailə həyatı və gələcək nəsillərə bu kodlama ötürülür. “Belə bir evladın uğurlu karyera qurması yalnız təsadüfi halda mümkündür”, – deyə Musəvi vurğulayıb.
O, həmçinin təhsil sahəsindəki zorakılıq və ayrıseçkilik halları barədə də danışıb. Pasientləri arasında məktəbə getməyə icazə verilməyən qız uşaqlarının olduğunu qeyd edən Musəvi, bu vəziyyətin onların təhsilinə ciddi mənfi təsir göstərdiyini bildirib.
Psixoloq bildirib ki, günümüzdə uğurlu qadınların sayı artıb. Onlar həm ofis sahələrində, həm də ənənəvi olmayan sahələrdə – məsələn, avtomobil təmiri və ev ustalığı – uğur qazanırlar. Musəvi vurğulayıb ki, peşələri cinsiyyətə görə bölmək düzgün deyil, qadınlar fiziki güc tələb etməyən işlərlə yanaşı, kişi sahələrində də uğur qazana bilirlər.
“Bəzən qadınların kişi enerjisi yüksək olur, travmalar onları daha da möhkəmləndirir və bu, onların karyerada uğur qazanmasına şərait yaradır”, – deyə Musəvi əlavə edib.