Abituriyentlərin ixtisas seçimi hər il valideynlər, müəllimlər və gənclər arasında müzakirə mövzusuna çevrilir. Bu məsələyə aydınlıq gətirən təhsil eksperti Emma İbrahimova “Tehsil365”ə müsahibəsində bildirib ki, seçim zamanı gənclərin şəxsi maraqları əsas götürülməlidir.
Onun sözlərinə görə, yüksək maaş vəd edən sahələr cəlbedici görünsə də, insan sevdiyi peşəni seçmədikdə gələcəkdə uğurlu ola bilmir:
“Hər bir abituriyent istədiyi ixtisası seçməlidir. Çünki insan öz sevdiyi peşədə peşəkarlıq nümayiş etdirə bilirsə, yüksək maaş vəd edilən digər ixtisaslar qədər gəlir qazana bilər. Əks halda, valideynin təkidi ilə seçilən sahə gəncin həyatında uğursuzluq yarada bilər”, – deyə ekspert vurğulayıb.
Əmək bazarının gələcək tələblərindən danışan İbrahimova kolleclərdə kompüter sistemləri, proqramlaşdırma və texnologiya ilə bağlı ixtisasların ön planda olacağını qeyd edib:
“Biz kompüter əsrində yaşayırıq. Buna görə də proqramlaşdırma və kompüterlə bağlı sahələr gələcəkdə daha çox tələb olunacaq. Şagirdlər kodlaşdırmaya diqqət yetirməlidirlər”, – deyə o bildirib.
Ekspert, həmçinin, valideynlərin abituriyentlərin seçimlərinə təsir göstərməsini düzgün saymadığını deyib:
“Təəssüf ki, bəzən valideynlər övladlarını özlərinin vaxtilə reallaşdıra bilmədiyi peşələrə yönləndirmək istəyirlər. Amma hər kəs özünü harada və necə görürsə, o sahəni seçməlidir. Mən müəllimliyi seçdiyim üçün xoşbəxtəm və fəxr edirəm. Abituriyentlər də valideynin seçimiylə deyil, öz arzuları ilə addım atmalıdırlar”, – deyə İbrahimova əlavə edib.