Azərbaycan Tibb Universiteti (ATU) yeni tədris ilindən etibarən bəzi ixtisaslar üzrə illik təhsil haqlarını artırıb. Belə ki, ötən il “Tibb” ixtisasının illik ödənişi 4500 manat olduğu halda, bu ildən 2000 manat artırılaraq 6500 manata çatdırılıb.
“Tehsil365” Tuqay Rzazadənin açıqlamasına əsasən xəbər verir ki, “Stomatologiya” ixtisasının da illik təhsil haqqı 2000 manat artırılaraq 6000 manat müəyyən edilib.
Qeyd edək ki, bu il 4-cü ixtisas qrupu üzrə 600 və daha çox bal toplayan abituriyentlərin sayı kifayət qədərdir. Bu səbəbdən yalnız 650 və yuxarı bal toplayanlar dövlət sifarişi əsasında ödənişsiz təhsil alma imkanı qazanacaq.
Mütəxəssislər bildirirlər ki, tibb təhsili müasir dövrdə dünyanın əksər ölkələrində bahalı sahələrdən hesab olunur. Lakin ödənişlərin artımı orta və aşağı gəlirli ailələrin övladlarının təhsil imkanlarını məhdudlaşdırır.
Məsələn, 630–640 bal toplayan bir abituriyent Tibb Universitetinə qəbul olsa da, yalnız ödənişli əsaslarla oxumaq imkanı əldə edir. Ailəsinin isə ildə 6500 manat təhsil haqqını ödəmək imkanı olmur. Bu isə həm abituriyent, həm də onun ailəsi üçün ciddi psixoloji sarsıntı yaradır.
Ekspertlər bu vəziyyətin sosial bərabərsizlik yaratdığını və təhsil alan gənclərin motivasiyasına mənfi təsir etdiyini vurğulayırlar.