Lənkəran-Astara Regional Təhsil İdarəsinin tabeliyində fəaliyyət göstərən təhsil müəssisələrinin lisey siniflərinə qəbul imtahanı mərkəzləşdirilmiş qaydada təşkil olunub.
Lənkəran-Astara Regional Təhsil İdarəsindən “Tehsil365”ə məlumat verilib ki, qəbul imtahanları 2025–2026-cı tədris ili üçün Cəlilabad şəhər 1 nömrəli humanitar və təbiət fənləri təmayüllü liseyə, Astara şəhər liseyinə, həmçinin Lənkəran şəhəri xarici dillər təmayüllü və Lerik şəhər inteqrasiya təlimli internat tipli gimnaziyanın VII–IX siniflərinin boş qalan yerlərinə qəbul üçün keçirilib.
İmtahanda iştirak edən şagirdlərə Azərbaycan dili və riyaziyyat fənləri üzrə hər fəndən 15 olmaqla, ümumilikdə 30 test tapşırığı təqdim olunub. Qəbul prosesinin şəffaf və obyektiv keçirilməsi üçün bütün lazımi təşkilati tədbirlər görülüb.
Qeyd edək ki, mərkəzləşdirilmiş imtahan nəticələrinə əsasən lisey və gimnaziya siniflərinin komplektləşdirilməsi həyata keçiriləcək.