Azərbaycan ədəbiyyatının görkəmli nümayəndəsi Cabir Mirzəbəy oğlu Novruzov (Cabir Novruz) 1933-cü il martın 12-də Xızı rayonunun Upa kəndində anadan olmuşdur. “Tehsil365” onun həyat və yaradıcılığını araşdıraraq oxuculara Cabir Novruza məxsus bənzərsiz sənət dünyasını təqdim edir.
Orta məktəbi bitirdikdən sonra Mirzə Ələkbər Sabir adına Pedaqoji Texnikumda təhsil almış və 1952-ci ildə Azərbaycan Dövlət Universitetinin jurnalistika fakültəsinə daxil olmuşdur. Bir il sonra Azərbaycan Yazıçılar İttifaqının tövsiyəsi ilə Moskvaya, Maksim Qorki adına Ədəbiyyat İnstitutuna göndərilmiş və 1957-ci ildə oranı bitirmişdir.
1958-ci ildə “Bakı” axşam qəzetinin ədəbiyyat şöbəsində ədəbi işçi kimi fəaliyyətə başlamış, 1967-1970-ci illərdə “Azərbaycan” ədəbi-bədii jurnalının, 1991-1993-cü illərdə isə “Ədəbiyyat və incəsənət” qəzetinin baş redaktoru olmuşdur. 1970-1997-ci illərdə isə Azərbaycan Yazıçılar İttifaqı İdarə Heyətinin katibi vəzifəsində çalışmışdır.
Cabir Novruzun poeziyası XX əsr Azərbaycan ədəbiyyatının parlaq səhifələrindən birini təşkil edir. Onun əsərlərində milli irsimizin zəngin ənənələri müasir ədəbi cərəyanlarla uğurla birləşir. İlk illərdən şair yüksək bəşəri-mənəvi dəyərləri tərənnüm edən şerləri ilə oxucuların sevgisini qazanmışdır. Lirik poeziya nümunələri və epik lövhəli əsərləri bədii səviyyəsi və mövzu rəngarəngliyi ilə seçilir. Cabir Novruzun yaradıcılığı yüksək mənəviyyata səsləyir və vətəndaş ruhunu əks etdirir. Onun sözlərinə bəstələnmiş çoxsaylı mahnılar isə musiqisevərlər tərəfindən həmişə böyük rəğbətlə qarşılanmışdır.
Şairin əsərləri vətənpərvərlik və mübarizlik ruhunun aşılanmasına mühüm xidmət göstərmiş, azərbaycançılıq ideyalarını təbliğ etmişdir. Cabir Novruzun poetik təfəkkürü lirikasının tarixi və həyati dəyərini gücləndirmişdir. Onun əsərləri dünyanın müxtəlif dillərinə tərcümə olunmuş və bədii tərcümələri sayəsində Azərbaycan oxucuları dünya poeziyasının qiymətli nümunələri ilə tanış olmuşdur.
Cabir Novruzun ictimai fəaliyyəti də zəngin olmuşdur. O, həyatının bütün mərhələlərində ölkədə gedən ictimai-siyasi proseslərin fəal iştirakçısı olmuş, xalqın həyatında baş verən mühüm hadisələrə düzgün qiymət vermişdir.
Şairin xidmətləri yüksək qiymətləndirilmiş, ona “Əməkdar incəsənət xadimi”, “Xalq şairi” fəxri adları, dövlət mükafatları, orden və medallar verilmişdir. 1995-ci ildə Cabir Novruz Azərbaycan Milli Məclisinin deputatı seçilmişdir.
Cabir Novruz 2002-ci il dekabrın 12-də 70 yaşında vəfat etmişdir. Onun yaradıcılığı Azərbaycan ədəbiyyatında dərin iz buraxmış, vətənpərvərlik və insanpərvərlik ideyalarını təbliğ edən nümunəvi irs kimi qiymətləndirilir.