Azərbaycan ədəbiyyatının görkəmli nümayəndəsi Rəsul Rza 1910-cu il mayın 19-da Göyçay rayonunda anadan olmuşdur. “Tehsil365” onun həyat və yaradıcılığını araşdıraraq oxuculara Rəsul Rzaya məxsus bənzərsiz sənət dünyasını təqdim edir.
1927-1937-ci illərdə Rəsul Rza Zaqafqaziya Kommunist Universitetində, Azərbaycan Dövlət Elmi-Tədqiqat İnstitutunda, Moskva Millətlər İnstitutunda və Ümumittifaq Dövlət Kinematoqrafiya İnstitutunda təhsil almışdır.
Şairin ilk əsəri “Bu gün” 1927-ci ildə Tiflisdə dərc olunan Qığılcım almanaxında çap olunub. Böyük Vətən müharibəsi illərində Rəsul Rza hərbi müxbir kimi fəaliyyət göstərmiş, xalqın qəhrəmanlıq mübarizəsini, qələbəyə inamını və humanizmini əks etdirən əsərlər yazmışdır. Onun “Vətən”, “İntiqam! İntiqam…”, “Ölməz qəhrəmanlar”, “Qəzəb və məhəbbət” kitabları, hekayə və oçerk topluları, “Vəfa” pyesi oxucular tərəfindən böyük maraqla qarşılanmışdır.
Rəsul Rzanın poeziya irsi arasında “Şerlər” (1959), “Pəncərəmə düşən işıq” (1962), “Duyğular, düşüncələr” (1964), “Dözüm” (1965), “Dünən, bu gün, sabah” (1973), “Güneylər, quzeylər” (1977), “Üzü küləyə” (1979) və məşhur “Rənglər” silsiləsi diqqət çəkir.
Onun lirik-epik “Qızılgül olmayaydı” poeması Azərbaycan ədəbiyyatında repressiya qurbanları mövzusunda yazılmış ən dəyərli əsərlərdən biridir və Müşfiqin həyatı və taleyindən ilham almışdır.
Yaradıcılığı ilə yanaşı Rəsul Rza ictimai-siyasi fəaliyyətlə də məşğul olmuşdur. O, 1939-cu ildə Azərbaycan Yazıçılar İttifaqının sədri, 1945-1948-ci illərdə Azərbaycan Kinematoqrafiya naziri, 1966-1975-ci illərdə Azərbaycan Ensiklopediyasının baş redaktoru, 1960-1981-ci illərdə Asiya və Afrika Ölkələri ilə Respublika Həmrəylik Komitəsinin sədri olmuşdur. 1964-cü ildə SSRİ Yazıçılar İttifaqı İdarə Heyətinin üzvü seçilmişdir.
Rəsul Rza 1981-ci ildə Bakı şəhərində ürək çatışmazlığından vəfat etmiş və Fəxri Xiyabanda dəfn olunmuşdur.