Tərtər rayonunda “Səyyar Gənclər Xidməti” layihəsi çərçivəsində növbəti görüş baş tutub.
“Tehsil365” xəbər verir ki, tədbirin rəsmi hissəsində çıxış edən Tərtər Rayon İcra Hakimiyyəti başçısının müavini Elvin Umudov və Gənclərin İnkişaf və Karyera Mərkəzinin Baş direktoru Azər Əliyev layihənin əhəmiyyətindən danışıblar. Qeyd olunub ki, bu təşəbbüs gənclərin dövlətçilik dəyərlərinə sadiq ruhda formalaşmasına, onların bilik və bacarıqlarının inkişafına mühüm töhfə verir.
Dövlət başçısının elan etdiyi 2025-ci il “Konstitusiya və Suverenlik İli” çərçivəsində həyata keçirilən “Səyyar Gənclər Xidməti”nin əsas məqsədi Ali Baş Komandan İlham Əliyevin rəhbərliyi ilə əldə olunan tarixi Qələbənin və ölkə suverenliyinin bərpasının gənclər arasında təbliği, vətənpərvərlik və dövlətçilik prinsiplərinin gücləndirilməsidir. Layihə, eyni zamanda, gənclərin milli-mənəvi dəyərlərə bağlılıq ruhunda tərbiyə olunmasına, məşğulluq, innovasiya, təhsil və sosial layihələr kimi dövlət gənclər siyasətinin imkanlarının region gənclərinə çatdırılmasına xidmət edir.
Tədbir çərçivəsində müxtəlif mövzularda təqdimatlar keçirilib, gənclərin təşəbbüslərinin dəstəklənməsi istiqamətində maarifləndirici fəaliyyətlər həyata keçirilib.
“Səyyar Gənclər Xidməti” region gənclərinin biliklərinin artırılması və dövlətçilik dəyərlərinin təbliği istiqamətində fəaliyyətini davam etdirir.
