“İnnostart” layihəsinin “Grand Final” mərhələsi keçirilib və qalib startaplar bəlli olub.
Naxçıvan Dövlət Universitetindən “Tehsil365”ə məlumat verilib ki, innovasiya və rəqəmsal inkişaf agentliyinin (İRİA) dəstəyi və “SUP VC” şirkətinin təşkilatçılığı ilə reallaşan layihədə Naxçıvan Dövlət Universitetinin (NDU) startap komandaları böyük uğura imza atıblar.
20 avqust 2025-ci ildə Bakı şəhərində baş tutan “İnnostart” Grand Final tədbirində NDU tələbələrindən ibarət dörd komanda ölkənin müxtəlif ali təhsil müəssisələrinin komandaları ilə finalda mübarizə aparıb.
Yekunda 17 startap arasından seçilən qaliblər ümumilikdə 50 min manatlıq mükafat fondu ilə təltif olunublar. Onların sırasında NDU-nu təmsil edən “İmYen” və “Specdeaf” komandaları da olub. Hər iki komanda 12 500 manat investisiya qazanaraq Türkiyənin Bilişim Vadisində inkubasiya proqramında iştirak etmək hüququ əldə ediblər.
Bu nailiyyət Naxçıvan Dövlət Universitetinin innovativ təşəbbüsləri dəstəkləməsi və ölkənin rəqəmsal inkişafına verdiyi töhfələrin bariz nümunəsi kimi dəyərləndirilir. Qeyd edək ki, Bilişim Vadisində keçiriləcək təcrübə proqramına yollanacaq 10 komanda arasında NDU-nu 3 komanda təmsil edəcək.