İnsan komada neçə gün, hətta aylarla qala bilər. Bu müddətdə xəstənin nələri hiss edib-etmədiyi həkimlər üçün də tam aydın deyil. Lakin bu vəziyyəti yaşamış insanların xatirələri komanın şüur və bədən üzərində təsirini bir qədər anlamağa imkan verir.
Çoxları komanı sadəcə dərin yuxu hesab edir. Əslində isə bu, beynin travma, insult, zəhərlənmə, infeksiya və ya kəskin maddələr mübadiləsi pozuntusu kimi hallara qarşı müdafiə reaksiyasıdır. Beyin güclü stress zamanı şüuru “söndürür” ki, həyatı qoruyub saxlaya bilsin.
Bəzi hallarda həkimlər xəstəni müalicə məqsədilə süni komaya salır. Bu “enerji qənaətli rejimdə” insanın xarici təsirlərə reaksiyası zəifləsə də, bəzən eşitmə və hiss etmə qabiliyyəti qismən qalır.
“Tehsil365” xarici mənbələrə istinadən xəbər verir ki, komada olan insanların təcrübələri çox fərqlidir:
Bəziləri səsləri eşitdiklərini, lakin danışa və hərəkət edə bilmədiklərini bildirirlər.
Digərləri komanı dərin yuxu kimi təsvir edir və heç nə xatırlamadıqlarını deyirlər.
Bəzi hallarda isə xəstələr kabus və ya qəribə yuxular gördüklərini söyləyirlər.
Komadan ayılan insanların bəzilərində yaddaş pozğunluğu müşahidə olunub.
Maraqlı faktlardan biri də odur ki, bir çoxu yaxınlarının səsini eşitdiklərini və bunun onlara geri qayıtmaq üçün güc verdiyini bildiriblər.
Koma hələ də elm üçün tam aydın olmayan bir fenomendir. Amma sağ qalanların xatirələri göstərir ki, komadakı insan tamamilə “qapalı” olmur. Bəzən səsləri eşidir, hiss edir və bu, onların yaşama iradəsini gücləndirir. Mütəxəssislər ailələrə məsləhət görür ki, komada olan insanlarla ünsiyyət qurmaqdan çəkinməsinlər.